કાલાવડ રોડ એમ.જી. હોસ્ટેલમાં મારામારી
બીજા રૂમમાં રહેતા બે સગાભાઇઓ વિરૂદ્ધ ગાંધીગ્રામ-૨ પોલીસમાં ફરિયાદ
રાજકોટ: કાલાવડ રોડ પર એમ.જી. હોસ્ટેલમાં રહેતો એલ.એલ.બી.નો છાત્ર દિવ્યેશ રમેશભાઇ સોસા(ઉ.વ.૨૩)ના રૂમે આવેલા ઉનાના તળ ગામે રહેતા મીત્રને હોસ્ટેલની લોબીમાં મોબાઇલમાં સોંગ અને ફ્લેશલાઇટ ચાલુ રાખવા બાબતે બોલાચાલી થયા બાદ બાજુના રૂમમાં રહેતા ભરત જગુભાઇ જાદવ અને મયુર જગુભાઇ જાદવને સમજાવવા ગયેલા છાત્રને ધોકા વડે મારમાર્યા અંગેની ફરિયાદ નોંધાઇ છે.
દિવ્યેશે ફરિયાદમાં જણાવ્યું છે કે, તે કોડીનારના કાચ ગામના વતની છે અને હાલ એમ.જી. હોસ્ટેલમાં રહી એલ.એલ.બી.નો અભ્યાસ કરે છે. ગઇકાલે તે બહારથી હોસ્ટેલમાં આવ્યો ત્યારે અંગત કામ માટે ઉનાના તળ ગામે રહેતો મિત્ર કૈલાશ બીપીનભાઇ પરમાર તેના રૂમે રોકાયો હોઇ, તેણે તેને કહ્યું કે, હું લોબીમાં ગીત સાંભળતો હતો ત્યારે આપણા રૂમની સામેની રૂમમાં રહેતા વિદ્યાર્થી ભરત જગુભાઇ જાદવ અને તેના ભાઇ મયુરે ડીસ્ટર્બ થતુ હોવાથી આ બંનેએ ઉંચા અવાજે મને મોબાઇલની ફ્લેશ લાઇટ તથા સોંગ બંધ કરવાનું કહી ગાળો ભાંડી હતી.
આ વાત સાંભળી તે સામેના રૂમમાં રહેતા બંને ભાઇઓને સમજાવવા જતા આરોપી ભરત ગાળો દેવા લાગ્યો હતો. અને તેના ભાઇ મયુરે ફરિયાદીના મિત્ર કૈલાશને પાટુ મારી દીધુ હતું અને બંનેએ ઉશ્કેરાઇ ધોકા વડે મારમારતા ડાબા હાથમાં ઇજા પહોંચી હતી. છોડાવવા માટે વચ્ચે પડેલા મિત્ર કૈલાશને પણ હોઠના ભાગે ઇજા થઇ હતી.
આ મારામારીમાં સામા પક્ષે મયુરને પણ ઇજા થઇ હતી. બાદ બંનેને સારવાર માટે સિવિલ હોસ્પિટલમાં ખસેડાયા હતા. આ બનાવ અંગે ગાંધીગ્રામ-૨ પોલીસે ફરિયાદ પરથી બંને શખ્સો વિરુદ્ધ ગુનો દાખલ કરી તપાસ હાથ ધરી છે.
