Surat Corporation : સુરત મહાનગરપાલિકા કમિશનરનો વોટ્સએપ ડીપીમાં ફોટો હોય તેવો નંબર સોશિયલ મીડિયામાં વાયરલ થયો છે. મ્યુનિ. કમિશનરના ફોટા સાથે નંબર વાયરલ થતાં પાલિકાના અધિકારીઓ-કર્મચારીઓ સતેજ થઈ ગયાં છે. મ્યુનિ.ના એક ગ્રુપમાં સ્કીન શોટ સાથે આ નંબર બ્લોક કરવા તથા ધ્યાને ન લેવા માટે વિનંતી કરવામાં આવી છે. ભુતકાળમાં મ્યુનિ. કમિશ્નરના ફોટા સાથે અનેક લોકો પાસે પૈસા અને વાઉચરની માગણી કરવામાં આવી હોવાથી મ્યુનિ. કમિશનરે પોલીસ કમિશ્નરને જાણ કરવામાં આવી હતી.
સુરત મ્યુનિ. કમિશનર તરીકે એમ.નાગરાજને થોડા દિવસ પહેલાં જ ચાર્જ સંભાળ્યો છે પરંતુ કેટલાક ભેજાબાજોએ મ્યુનિ. કમિશનરના ફોટા સાથે ફ્રોડ કરવા માટેની તૈયારી કરી લીધી છે. મ્યુનિ. કમિશ્નર એમ. નાગરાજનના વોટ્સએપ ડીપીમાં ફોટો મુકવામાં આવ્યો છે અને પ્લસ +84 562370432 નંબર છે. આ નંબર પાલિકાના અધિકારી-કર્મચારીઓના મોબાઈલમાં વાયરલ થયો છે.
નંબર વિદેશનો હોય અને તેમા મ્યુનિ. કમિશ્નરનો ફોટો હોય મ્યુનિ. કર્મચારીઓ ચેતી ગયા છે. મ્યુનિ.ના એક ગ્રુપમાં આ નંબર સાથે સ્ક્રીન શોર્ટ મુકાયો છે. જેમાં એવું લખ્યું છે કે, કમિશ્નરના નામથી આ નંબર પરથી કોઈ મેસેજ અથવા ફોન આવે તો તેને ધ્યાને ન લેવા તથા બ્લોક કરવા માટે વિનંતી તેવું લખાયું છે.
આવી જ ઘટના મે 2022માં પણ બની હતી તત્કાલિન મ્યુનિ. કમિશ્નર બંછાનિધિ પાનીના ફોટા સાથે સુરતના કેટલાક લોકો પાસે પૈસા અને વાઉચરની ડિમાન્ડ કરવામાં આવી હતી. તત્કાલિન મ્યુનિ. કમિશનરે પોતાના નંબર પરથી સુરતના કેટલાક લોકોને વોટ્સઅપ પર મેસેજ કરવામાં આવ્યા છે તો કેટલાક લોકોને મેસેજ કરવામાં આવ્યા હતા. આ અંગે કેટલાક લોકોએ મ્યુનિ. કમિશ્નરનું ધ્યાન દોરતા મ્યુનિ. કમિશનર પણ ચોંકી ગયા હતા. તેઓએ તાત્કાલિક સોશ્યલ મીડિયા મારફતે ખુલાસો કરવાની ફરજ પડી હતી.
હવે ત્રણેક વર્ષ બાદ કોઈ ભેજાબાજે મ્યુનિ. કમિશ્નરના ફોટા સાથે ફરી ખેલ થયો છે.
