Jagadguru Avimukteshwaranand : વારાણસીમાં સ્વામી અવિમુક્તેશ્વરાનંદે ઉત્તર પ્રદેશના ડેપ્યુટી સીએમ બ્રજેશ પાઠક દ્વારા 101 બટુકોના સન્માન કરવાના પગલા પર ગંભીર સવાલો ઉઠાવ્યા છે. આ સમગ્ર વિવાદ માઘ મેળામાં મૌની અમાસ દરમિયાન પોલીસકર્મીઓ દ્વારા વેદપાઠી બટુકોની શિખા (ચોટલી) ખેંચવા અને મારપીટ કરવાથી શરૂ થયો હતો. ડેપ્યુટી સીએમએ તાજેતરમાં આ ઘટનાને ‘પાપ’ ગણાવી પોતાના નિવાસસ્થાને બટુકોનું સન્માન કર્યું હતું. જેને શંકરાચાર્યએ અપૂરતું અને વિરોધાભાસી ગણાવ્યું છે. તેમણે ન્યાય ન મળવા પર 11 માર્ચે લખનઉ કૂચ કરવાની જાહેરાત કરી છે.
અવિમુક્તેશ્વરાનંદનો પ્રહાર: પહેલા મારો છો, પછી ફૂલ ચઢાવો છો?
સ્વામી અવિમુક્તેશ્વરાનંદે ડેપ્યુટી સીએમના સન્માન સમારોહ પર કટાક્ષ કરતા કહ્યું, “શું આવું કરવાથી શાંતિ થઈ જશે? તમે કોઈને મારો છો અને પછી તેના પર ફૂલ ચઢાવો છો, તે કેવી રીતે શક્ય છે?” તેમણે મુખ્યમંત્રી યોગી આદિત્યનાથના ‘મર્યાદા’ વાળા નિવેદન પર પલટવાર કરતા કહ્યું કે, મોટા પદ પર બેસવાથી કોઈને અન્યાય કરવાનો લાયસન્સ નથી મળી જતું. તેમણે આરોપ લગાવ્યો કે ભગવા વસ્ત્રો ધારણ કરવા છતાં શાસનમાં સનાતન ધર્મના પ્રતીકો અને શિખાનું અપમાન કરવામાં આવી રહ્યું છે.
આ પણ વાંચો : સૂર્યકુમારે તોડ્યો રોહિત શર્માનો વર્લ્ડ રેકોર્ડ, બન્યો દુનિયાનો સૌથી સફળ T20I કેપ્ટન
ડેપ્યુટી સીએમનો ‘પાપ’ સ્વીકાર અને સન્માન
બીજી તરફ, ડેપ્યુટી સીએમ બ્રજેશ પાઠકે 101 બટુકોને પોતાના આવાસ પર બોલાવી તેમને હાર પહેરાવી સન્માન કર્યું અને તેમના આશીર્વાદ લીધા. પાઠકે જાહેરમાં સ્વીકાર્યું કે, બટુકો સાથે જે થયું તે ‘પાપ’ ની શ્રેણીમાં આવે છે. તેમણે કહ્યું કે, પરંપરાઓનું આદર કરવું સમાજની જવાબદારી છે. જોકે, અવિમુક્તેશ્વરાનંદનું માનવું છે કે, બ્રજેશ પાઠક દબાણમાં છે અને ‘કાલનેમી’ જેવી શક્તિઓથી ઘેરાયેલા છે.
રાજકીય ઘમાસણ અને રાજીનામાની માંગ
આ ધાર્મિક વિવાદમાં હવે સમાજવાદી પાર્ટી પણ કૂદી પડી છે. સપાના ધારાસભ્ય રવિદાસ મેહરોત્રાએ સવાલ ઉઠાવ્યો કે આ મુદ્દાને સમજવામાં ડેપ્યુટી સીએમને એક મહિનો કેમ લાગ્યો? તેમણે નૈતિકતાના આધારે બ્રજેશ પાઠક પાસે રાજીનામાની માંગ કરી છે. જ્યારે યુપીમાં મંત્રી નરેન્દ્ર કશ્યપે મુખ્યમંત્રીનો પક્ષ રાખતા કહ્યું કે, માત્ર નામની આગળ શંકરાચાર્ય લખી લેવાથી કોઈ શંકરાચાર્ય નથી બની જતું અને શિષ્યોનું વર્તન પણ ન્યાયસંગત નહોતું.
11 માર્ચે લખનઉ કૂચનું એલાન
અવિમુક્તેશ્વરાનંદે સ્પષ્ટ કરી દીધું છે કે, તેઓ માત્ર નિવેદનો અને પ્રતીકાત્મક સન્માનથી સંતુષ્ટ નથી. તેમણે આ ઘટનાને સનાતન ધર્મના ધ્વજ (શિખા) પર પ્રહાર ગણાવ્યો છે. ન્યાયની માંગ સાથે તેઓ પોતાના સમર્થકો અને બટુકો સાથે 11 માર્ચના રોજ લખનઉ માટે પ્રસ્થાન કરશે.
