પરપ્રાંતીય શ્રમિક પરિવારના 4 લોકો બાઇકમાં સવાર હતા
મૃતકોના બાઇકમાં સવાર 12 વર્ષના બાળકની ખોપરી ફાટી ગઇ, એક યુવાન સારવારમાં
અમરેલી : લીલિયા તાલુકાના ગુંદરણ ગામ નજીક શ્રમિકના ફોર સવારી બાઇક આગળ જતાં માલવાહક વાહન પાછલ ઘૂસી જતાં આ ઘટનામાં ૪ પૈકી ૩ના મોત નીપજ્યા હતા.
બનાવની પ્રાપ્ત વિગતો મુજબ લીલિયા તાલુકાના ઢાંગલા ગામની સીમમાં ભાગિયું વાવવા રાખેલા શ્રમિકોનું બાઇક આગળ જતા ભારવાહક વાહન પાછળ અચાનક ઘૂસી જતાં ફોર સવારી બાઇકમાં સવાર થયેલાં જયેશ બરસિંગ (ઉ.વ.૧૭), હેમરાજ સવેલસિંગ (ઉ.વ.૧૪), રઇલેશ સવેલ સિંગ (ઉ.વ.૧૨)ના ઘટનાસ્થળે જ કમકમાટી ભર્યા મોત નીપજ્યાં હતા જ્યારે આ બાઇક પર સવાર સુનિલ સવેલસિંગ (ઉ.વ.૧૮)ને ગંભીર ઇજા સાથે લીલિયાની હોસ્પિટલમાં સારવારમાં ખસેડયો છે.
આ બનાવમાં એક જ પરિવારના બે તેમજ અન્ય પરિવારના એકનું મૃત્યુ નીપજતાં પરિવારમાં હૈયાફાટ કલ્પાંત સર્જાયું હતું. આ અકસ્માત એટલો ગંભીર હતો કે ૧૨ વર્ષીય બાળકની ખોપરી ફાટી ગઇ હતી.
ઉપરોક્ત પરિવાર મૂળ મધ્યપ્રદેશનો વતની છે. છેલ્લા ૧૬ વર્ષથી લીલિયા પંથકમાં સ્થાયી થઇને ભાગિયું રાખવાની મજુરી કરે છે.
ઘટના સ્થળે પોલીસે પહોંચી ત્રણેયના મૃતદેહોને લીલિયા ખસેડી પોસ્ટમોર્ટમ કાર્યવાહી કરી હતી. તેમજ વાહનચાલક સામે ગુન્હો નોંધી પકડી પાડવા ચક્રો ગતિમાન કર્યા છે.
