પ્રેમ સંબંધ રાખવા માટે દબાણ કરી
‘આજે તો તું બચી ગઈ, પરંતુ હવે મારી સાથે પ્રેમ સંબંધ નહીં રાખે તો જાનથી મારી નાખીશ’ તેવી ધમકી આપી
નડિયાદ: ખેડા તાલુકામાં હરિયાળા ગામે આવેલી કંપનીમાં નોકરી કરતી યુવતીને મશીન ઓપરેટરે ‘તું મારી સાથે કેમ પ્રેમ સંબંધ રાખતી નથી’ તેમ કહી જાનથી મારી નાખવાની ધમકી આપતા ચકચાર મચી જવા પામી હતી. આ બનાવ અંગે ખેડા ટાઉન પોલીસે ગુનો નોંધી વધુ કાર્યવાહી હાથ ધરી હતી.
તારાપુર તાલુકાના મોરજ ગામમાં રહેતી યુવતી (ઉં.વ.૨૨) છેલ્લા બેએક વર્ષથી હરિયાળા ગામની સીમમાં આવેલી અમંતા કંપનીમાં વર્કર તરીકે નોકરી કરે છે. આ યુવતી સાંજના પોણા ચારેક વાગે કંપનીમાં પેકિંગ એરિયામાં કામ કરતી હતી, ત્યારે કંપનીમાં મશીન ઓપરેટર તરીકે કામ કરતા વિવેકકુમાર મનીષભાઈ પટેલ (રહે.પરીએજ, તા.માતર) યુવતી પાસે આવી અપશબ્દો બોલી કહ્યું હતું કે, ‘તું પહેલા મારી સાથે પ્રેમ સંબંધ રાખતી હતી, પરંતુ હવે મારી સાથે કેમ પ્રેમ સંબંધ રાખતી નથી અને મારા ફોન કેમ ઉપાડતી નથી’ તેમ કહી તેના હાથમાંનુ કટર મારવા જતા યુવતીના ગળાના ભાગે વાગતા લોહી લુહાણ થઈ ગઇ હતી. જેની જાણ થતાં કંપનીમાં નોકરી કરતા અન્ય વ્યક્તિઓને થતા તેઓ યુવતીને છોડાવવા દોડી આવતા વિવેકકુમારે ‘આજે તો તું બચી ગઈ છું, પરંતુ હવે પછી મારી સાથે પ્રેમ સંબંધ નહીં રાખે તો તને જાનથી મારી નાખીશ’ તેવી ધમકી આપી નાસી ગયો હતો. આ બનાવ અંગે યુવતીની ફરિયાદને આધારે ખેડા ટાઉન પોલીસે વિવેક પટેલ સામે ગુનો નોંધી કાર્યવાહી હાથ ધરી હતી.
