– શાસનના છેલ્લા દિવસોમાં લહાણી કરવા ઉત્સુક, અધ્યક્ષસ્થાનેથી 28 કામ લેવાયા
– અલગ-અલગ કામોની એકથી 3 માસની કપાત સાથે સમયમર્યાદા વધારી દેવાઈ, એજન્સીઓ સાથે નેગોશીએશન કરી 10.30 લાખ બચાવ્યાનો દાવો
ભાવનગર : ભાવનગર મ્યુનિસિપાલિટીમાં ભાજપના શાસનની પાંચ વર્ષની ટર્મ પૂરી થવા આવી છે, ત્યારે શાસનના છેલ્લા દિવસોમાં ભાજપના પદાધિકારીઓ વિકાસના કામોની લહાણી કરવા ઉત્સુક હોય તેમ સ્ટેન્ડીંગ કમિટીની મળેલી છેલ્લી બેઠકમાં વધારાના ૮.૯૪ કરોડ મળી કુલ રૂા.૧૨૩.૧૪ કરોડના વિકામ કામોને રોકેટગતિએ મંજૂરીની મહોર મારી દીધી છે.
મંત્રેશથી ટોપ-૩ સર્કલ સુધી આઈકોનિક રોડ બનાવવા, રીંગ રોડ પર ફાયર સ્ટેશન ઉભું કરવા, સમય મર્યાદા વધારવા સહિત જુદા-જુદા ૮૭ કામોને બહાલી આપવા માટે આજે શનિવારે મનપાની સ્ટેન્ડીંગ કમિટીની છેલ્લી બેઠક બંધ બારણે મળી હતી. આ મિટીંગમાં રજૂ થયેલા તમામ તુમારને ટૂંકી ચર્ચાના અંતે બહાલી આપવામાં આવી હતી. જેમાં ૮૭ પૈકી રૂા.૧૧૪.૨૦ કરોડના ૪૨ વિકાસ કામોનો પણ સમાવેશ થાય છે. આ ઉપરાંત અધ્યક્ષસ્થાનેથી ૨૮ કામોને મંજૂર કરાયા હતા. જેમાં ૮.૯૪ કરોડના પાંચ વિકાસ કામોનો પણ સમાવેશ થાય છે.
સ્ટેન્ડીંગ કમિટીના ચેરમેન અને સભ્યોએ સમયમર્યાદામાં વધારો કરવાના તુમારોમાં ખેલ પાડયો હતો. પોતાનો હાથ ઉંચો રાખવા અલગ-અલગ કામોની એકથી ત્રણ માસની કપાત સાથે સમયમર્યાદા વધારી દેવામાં આવી હતી. તેમજ મહિલા કોલેજ સર્કલથી એરપોર્ટ સુધીના વ્હાઈટ ટોપિંગ રોડના કામમાં સમયમર્યાદા વધારવામાં આવી ન હતી.
તેમજ ચાર વિકાસ કામોમાં એજન્સી સાથે ચેરમેને વધુ નેગોશીએશન કરાવી રૂા.૧૦.૩૦ લાખ ઘટાડયા હોવાનો દાવો કરાયો છે.
