Lioness Attack Incident : અમરેલી, ગીર સોમનાથ સહિત સૌરાષ્ટ્રના ગામડાંઓમાં સિંહ-દીપડા આંટાફેરાની ઘટનાઓ સામે આવતી હોય છે. ઘણી વખત વન્યપ્રાણી ખેતરમાં રહેતા મજૂરના પરિવાર પર હુમલો કર્યા હોવાની ઘટનાઓ પ્રકાશમાં આવતી હોય છે, ત્યારે ગીર અમરેલીના ધારીમાં સિંહણના હુમલામાં 5 વર્ષીય બાળકનું મોત છે. જ્યારે ગીર સોમનાથના ગીરગઢડા તાલુકાના શાણાવાંકિયા ગામે આંબાના બગીચામાં રમતી 8 વર્ષની બાળકી પર સિંહણે હુમલો કર્યો હતો. આ દરમિયાન માતાએ બૂમાબૂમ કરતાં સિંહણ માસૂમને છોડી જતી રહી હતી. આ પછી ગંભીર હાલતમાં બાળકીને તાત્કાલિક હોસ્પિટલ ખસેડવામાં આવી હતી.
ધારીમાં સિંહણના હુમલામાં 5 વર્ષીય બાળકનું મોત
અમરેલીના ધારીમાં ચાર પગના આંતકની ઘટના સામે આવે છે. આજે(10 માર્ચ, 2026) ધારીના માણાવાવ ગામે રામકુભાઈ વલકુભાઈ વાળાની વાડીમાં પરપ્રાંતિય ખેત મજૂરના 5 વર્ષના બાળક પર સિંહણે હુમલો કર્યો હતો. નરભક્ષી બનેલી સિંહણે ફાડી ખાતા ધવલ ઈશ્વરભાઈ કટારા નામના બાળકનું કરૂણ મોત નીપજ્યું હતું. મૃતક બાળકના મૃતદેહને ચલાલા હોસ્પિટલ ખાતે લઈ જવામાં આવ્યો હતો. સિંહણ હુમલાની ઘટનાને લઈને વન વિભાગની ટીમ દોડી પહોંચી હતી અને વનવિભાગ દ્વારા સિંહણને પકડી પાડવાની કવાયત શરૂ કરી છે.
ગીરગઢડાના શાણાવાંકિયામાં સિંહણના હુમલામાં બાળકીને ગંભીર ઈજા
ગીર સોમનાથ ગીરગઢડા તાલુકાના શાણાવાંકિયામાં ભૂતડાદાદા ધજા વિસ્તારમાં મંગળવારે બપોરના સમયે રીવા મહેશ રામાણી(ઉં.વ.8) નામની બાળકી આંબાના બગીચામાં રમી રહી હતી. એટલાંમાં અચાનક સિંહણ આવી પહોંચીને બાળકીને ઉપાડી લીધી હતી. જો કે, બાળકીની માતાએ સિંહણ પાસે દોટ મૂકી અવાજ કરતાં સિંહણ બાળકીને છોડીને જતી રહી હતી.
આ પણ વાંચો: ધારીમાં લગ્નના ફૂલેકામાં બઘડાટી, અચાનક પાડોશીએ કર્યો હુમલો, વરરાજાના સગાઓએ પોલીસ સાથે ઘર્ષણ કર્યું
સિંહણના હુમલામાં ગંભીર રીતે ઈજાગ્રસ્ત રીવાને તાત્કાલિક ઉના સરકારી હોસ્પિટલમાં ખસેડવામાં આવી હતી. રીવાને છાતી અને પીઠના ભાગે ઈજા પહોંચી હતી. ઉનાની સરકારી હોસ્પિટલમાં પ્રાથમિક સારવાર બાદ વધુ સારવાર માટે બાળકીને ખાનગી હોસ્પિટલ લઈ જવામાં આવી હતી. સિંહણના હુમલાને લઈને વન વિભાગની ટીમ હોસ્પિટલ પહોંચીને આગળની કાર્યવાહી હાથ ધરી છે.
