Patan News: પાટણ જિલ્લાના ચાણસ્મા તાલુકાના ઝીલીયા ગામે ગત 15 માર્ચની રાત્રે કાયદો અને વ્યવસ્થાના લીરેલીરા ઉડાવતી ઘટના સામે આવી છે. ગામના એક ફાર્મ હાઉસ પર 15 થી 20 જેટલા હથિયારધારી શખસોએ હુમલો કરી તોડફોડ મચાવી હતી. આ મામલે ચાણસ્મા પોલીસે ગુનો નોંધી 3 શખ્સોની ધરપકડ કરી છે, જ્યારે ફરજમાં બેદરકારી બદલ PI સહિત 8 પોલીસકર્મીઓને સસ્પેન્ડ કરવામાં આવ્યા છે.
શું હતો સમગ્ર મામલો?
પ્રાપ્ત વિગતો મુજબ ઝીલીયા ગામે નિર્માણ પામનાર રામાપીરના મંદિરના ફાળા ઉઘરાવવા બાબતે ભાવેશભાઈ દેસાઈ અને જીતુભા (મુડેઠા) વચ્ચે મનદુઃખ થયું હતું. આ અદાવત રાખીને 15 માર્ચની મધરાત્રે આશરે 11:45 વાગ્યે 8 જેટલી ગાડીઓમાં સવાર થઈને આવેલા શખસો ફાર્મ હાઉસ પર હુલ્લડ મચાવ્યું હતું.
સીસીટીવીમાં કેદ થયો આતંક
હુમલાખોરો ધારીયા, તલવાર અને લાકડીઓ જેવા જીવલેણ હથિયારો સાથે આવ્યા હતા. તેઓએ ફાર્મ હાઉસના ગેટ, દીવાલ અને ધાર્મિક તસવીરોમાં તોડફોડ કરી જાનથી મારી નાખવાની ધમકીઓ આપી હતી. સમગ્ર ઘટના સીસીટીવી કેમેરામાં કેદ થઈ છે, જેમાં મુડેઠાના જીતુભા, વામૈયાના જહુભા અને દલપુજી નામના શખ્સોની ઓળખ થઈ હોવાનું ફરિયાદમાં જણાવાયું છે.
પોલીસની હાજરીમાં જ હુમલો
ઘટના સમયે 112 પોલીસની બે વાન સ્થળ પર પહોંચી હતી, પરંતુ હુમલાખોરોએ પોલીસની પણ પરવા કરી ન હતી. હથિયારો બતાવી હુમલાખોરોએ પોલીસને ભગાડી મૂકી હોવાનો વીડિયો સોશિયલ મીડિયામાં વાઈરલ થયો છે. હુમલા દરમિયાન પોલીસની વાન પર હુમલો કરવા જતાં હોય તેવા દ્રશ્યો કેમેરામાં કેદ થયા હતા., જેના કારણે ‘ફરજમાં રુકાવટ’નો અલગ ગુનો પણ નોંધવામાં આવ્યો છે.
પાટણ પોલીસે ગુજરાત પોલીસનું નાક કપાવ્યું!
સમગ્ર ઘટના બની ત્યારે પોલીસની વાન અને જવાનો ત્યાં હાજર હતા પરંતુ આવારા તત્ત્વોનો ખૌફ જોઈ પોલીસ પણ ડરી ગઈ હોય તેવા દ્રશ્યો સર્જાયા હતા. પોલીસ સાથે ઝપાઝપીના ઈરાદે જયારે લુખ્ખાઓ આગળ વધ્યા ત્યારે પોલીસે સ્થળ છોડી દોડી છૂટી હતી. જે અંગે પાટણ પોલીસને સવાલ કરવામાં આવતા, શરમજનક રીતે જવાબ મળ્યો હતો કે, પુરતો પોલીસ સ્ટાફ નહીં હોવાથી વધુ સ્ટાફ લેવા માટે પોલીસ ગઈ હતી. ત્યારે હવે ચર્ચાઓ ઉપડી છે કે જો પોલીસ જ આવા ગુંડાઓથી ભાગી છૂટે તો સામાન્ય માણસ અને કાયદો વ્યવસ્થાનું શું? સમગ્ર ઘટનાનો વીડિયો વાઈરલ થતાં પાટણ પોલીસનું જાણે નાક કપાયું હતું.
આ કેસમાં અત્યાર સુધીમાં બે FIR નોંધાઈ છે
1. ફાર્મ હાઉસના માલિક ભાવેશભાઈ દેસાઈ તરફથી
2. 112 પોલીસ વાનના ઇન્ચાર્જ તરફથી
આ પણ વાંચો: ગુજરાતમાં કમોસમી વરસાદની આફત, અપર એર સર્ક્યુલેશનને કારણે આગામી ત્રણ દિવસ માવઠાની શક્યતા
પોલીસ બેડામાં હડકંપ
ઘટનાની ગંભીરતાને જોતા અને ફરજમાં નિષ્કાળજી દાખવવા બદલ તંત્રએ કડક પગલાં લીધા છે. ચાણસ્માના PI સોલંકી, ASI અને હેડ કોન્સ્ટેબલ સહિત કુલ 3 પોલીસકર્મીઓ અને 5 GRD જવાનોને તાત્કાલિક અસરથી સસ્પેન્ડ કરી દેવામાં આવ્યા છે.
