Abandoned Newborn Rescued in Ahmedabad: અમદાવાદના ઇન્દિરા બ્રિજ પાસે આવેલા ભાટ ગામ નજીક માનવતાને લજવતી એક ઘટના સામે આવી છે, જેમાં માત્ર બે દિવસના નવજાત શિશુને નિરાધાર હાલતમાં તરછોડી દેવામાં આવ્યું હતું. કોઠારી હોસ્પિટલ પાસે રાત્રિના સમયે બે અજાણી યુવતીઓ આ માસૂમ બાળકને મૂકીને પલાયન થઈ ગઈ હતી. બાળકના રડવાનો અવાજ આવતા જ સ્થાનિક લોકો એકઠા થઈ ગયા હતા અને તુરંત પોલીસને જાણ કરી હતી. એરપોર્ટ પોલીસે ઘટનાસ્થળે પહોંચી બાળકનો જીવ બચાવવા માટે તેને તાત્કાલિક સિવિલ હોસ્પિટલના બાળકોના વોર્ડમાં સારવાર અર્થે ખસેડ્યું હતું, જ્યાં હાલ બાળકની સ્થિતિ સ્થિર હોવાનું જાણવા મળ્યું છે.
પાણીપુરીની લારીમાં બાળકને તરછોડ્યું
આ ઘટનાની વિગતો મુજબ, ગત 17 માર્ચની રાત્રે આશરે 8:41 વાગ્યે બે યુવતીઓ હોસ્પિટલ પાસેની એક સાંકડી ગલીમાં પ્રવેશતી જોવા મળી હતી. આસપાસ કોઈ જોઈ રહ્યું નથી તેની ખાતરી કર્યા બાદ, તક મળતા જ તેઓએ માસૂમ બાળકને ત્યાં પડેલી એક પાણીપુરીની લારીમાં મૂકી દીધું હતું. સીસીટીવી ફૂટેજમાં સ્પષ્ટ દેખાય છે કે એક યુવતીના હાથમાં બાળક હતું અને બીજી યુવતી પાસે બેગ હતી. તેઓએ માત્ર બે જ મિનિટમાં આ કૃત્ય આચરીને ત્યાંથી રવાના થઈ ગઈ હતી. પોલીસે આ ફૂટેજ કબજે કરીને બંને યુવતીઓની ઓળખ કરવા માટે તપાસ હાથધરી છે.
આ પણ વાંચો: જામનગરમાં મામા સાથેના ઝઘડાનું કરુણ અંજામ: બે પિતરાઈ ભાઈઓએ એક પછી એક ગળાફાંસો ખાઈ જીવન ટૂંકાવ્યું
બાળકને તરછોડીને ભાગનાર યુવતીઓની શોધખોળ શરૂ
પોલીસ તપાસમાં સામે આવ્યું છે કે જ્યારે બાળક મળી આવ્યું ત્યારે તેના શરીર પર માત્ર એક જ કપડું લપેટાયેલું હતું. રાત્રે 9:10 વાગ્યે કંટ્રોલ રૂમમાં મેસેજ મળતા જ એરપોર્ટ પોલીસ એક્શનમાં આવી હતી અને નવજાતની સુરક્ષા સુનિશ્ચિત કરી હતી. હાલમાં પોલીસે અજાણી યુવતીઓ વિરુદ્ધ ગુનો નોંધીને તેઓ ક્યાંથી આવી હતી અને બાળકને કેમ તરછોડ્યું તે દિશામાં તપાસ શરૂ કરી છે.
