અમદાવાદ, બુધવાર, 1 એપ્રિલ,2026
અમદાવાદમાં આવેલા સાંકડા રસ્તાઓ અને ગલીઓમાં સફાઈ કરાવવા
કોર્પોરેશન તરફથી વિવિધ એજન્સીઓ પાસે હેન્ડકાર્ટથી સફાઈ કરાવવામા આવે છે. તંત્ર
તરફથી હેન્ડકાર્ટની સંખ્યાને લઈ જાહેર કરવામા આવતા આંક કરતા ઓછી સંખ્યામાં
હેન્ડકાર્ટ મુકી એજન્સીઓને મોટી રકમનુ
ચૂકવણુ કરી કૌભાંડ આચરવામા આવતુ હોવાનો આક્ષેપ પૂર્વ કોર્પોરેટરે કર્યો છે. આ સાથે
જ વિજિલન્સ તપાસની માંગ મ્યુનિસિપલ કમિશનર સમક્ષ કરી છે.
શહેરના મધ્યઝોનમા અને ખાસ કરીને ખાડિયા,જમાલપુર સહિતના
વોર્ડમાં સાંકડા રસ્તાઓ ઉપર ગલીઓ અને ચાલી વિસ્તારમા મોટી સંખ્યામા લોકો વસવાટ કરે
છે.આ પ્રકારના સાંકડા રસ્તાઓ અને ગલીઓ તથા ચાલીઓમા ગટર સફાઈ સહિતની અન્ય કામગીરી
હેન્ડકાર્ટ દ્વારા કરાવવામા આવે છે.શહેરના અન્ય છ ઝોનમા પણ આ પધ્ધતિથી
હેન્ડકાર્ટની મદદથી સાંકડા રસ્તાઓ ઉપર સફાઈ કરાવવામા આવે છે.જમાલપુરના પૂર્વ
કોર્પોરેટરે આક્ષેપ કરતા કહયુ,
એક હેન્ડકાર્ટ દીઠ કોર્પોરેશન રોજના રુપિયા ૮૦૦ અને મહિને ૨૪ હજાર એજન્સીને
ચૂકવે છે.સંકલનમાંથી કોર્પોરેટરને આપવામા આવેલી માહિતી મુજબ,સાત ઝોનમાં
અંદાજે ૬૦૦ જેટલા હેન્ડકાર્ટ ચાલે છે.કોર્પોરેટરના આક્ષેપ મુજબ, જે હેન્ડકાર્ટની
સંખ્યા બતાવવામા આવે છે તેનાથી ઓછી સંખ્યામા હેન્ડકાર્ટ ચાલતા હોવા છતાં વાર્ષિક
અઢી કરોડ જેટલી માતબર રકમ એજન્સીને ચૂકવવામા આવે છે.
હેન્ડકાર્ટમા જી.પી.એસ.સિસ્ટમ જ નથી
હેન્ડકાર્ટને લઈ દક્ષિણ ઝોનના સોલિડ વેસ્ટ વિભાગના ડેપ્યુટી
ડાયરેકટરના લેખિત જવાબ મુજબ,
તેમના ઝોનમાં હેન્ડકાર્ટની કામગીરીના માત્ર ફોટા લેવાય છે.હેન્ડકાર્ટ ગ્લોબલ
પોઝીશનિંગ સિસ્ટમ સાથે કનેકટ કરાયા નથી. માત્ર જે તે વોર્ડના સેનીટેશન સ્ટાફ
દ્વારા કામગીરીનું નિરીક્ષણ કરવામા આવે છે. આ જવાબ જ ઈશારામા ઘણુ બધુ કહી જાય છે.
