જિલ્લાના હાઇવે માર્ગો ઉપર વધતા અકસ્માતો વચ્ચે
નરોડાના બે યુવાનો હિંમતનગર જઈ રહ્યા હતા તે દરમિયાન અકસ્માતની ઘટના બની ઃ એક યુવાન ગંભીર રીતે ઘાયલ
ગાંધીનગર : ગાંધીનગર નજીક ચિલોડા હિંમતનગર હાઇવે ઉપર છાલા પાસે બાઈક
ઉપર જઈ રહેલા નરોડાના બે યુવાનોને કારચાલક અડફેટે લઈને ફરાર થઈ ગયો હતો. જે ગંભીર
અકસ્માતમાં એક યુવાનનું મોત થયું હતું જ્યારે એકને ઇજાઓ પહોંચી છે. જે ઘટના
સંદર્ભે હાલ ચિલોડા પોલીસ દ્વારા ફરાર કાર ચાલક સામે ગુનો દાખલ કરીને તેને પકડવા
મથામણ શરૃ કરવામાં આવી છે.
પાટનગર ગાંધીનગર શહેર તેમજ આસપાસના હાઇવે માર્ગોે ઉપર
અકસ્માતની ઘટનાઓ છેલ્લા ઘણા સમયથી વધી રહી છે અને તેમાં પણ હીટ એન્ડ રનના બનાવોમાં
ચિંતાજનક રીતે વધારો થઈ રહ્યો છે. આ સ્થિતિ વચ્ચે ગઈકાલે ચિલોડા હિંમતનગર હાઇવે
ઉપર છાલા પાસે વધુ એક હીટ એન્ડ રનની ઘટનામાં નરોડાના યુવાનનું મોત થયું છે. જે
ઘટના સંદર્ભે પોલીસ સૂત્રોમાંથી મળતી વિગતો પ્રમાણે અમદાવાદના નરોડા વિસ્તારમાં
રહેતા રમેશભાઈ કાનજીભાઈ પ્રજાપતિનો ૩૫ વર્ષીય પુત્ર કિશનકુમાર રવિવારે સવારે તેના
મિત્ર સાવન સાથે મોટર સાયકલ લઈને હિંમતનગર તરફ જઈ રહ્યો હતો. સવારે આશરે ૧૧થ૦૦
વાગ્યાના સુમારે જ્યારે તેઓ છાલા બ્રિજ ઉતરી રહ્યા હતા, ત્યારે લાલ રંગની
ફોરવ્હીલ ગાડીના ચાલકે ગાડી ગફલતભરી રીતે ચલાવી કિશનકુમારની બાઈકને પાછળથી ટક્કર
મારી હતી. અકસ્માત સર્જ્યા બાદ કારનો ચાલક ઘટનાસ્થળેથી ફરાર થઈ ગયો હતો. જે
અકસ્માતની ઘટનાને પગલે આસપાસના લોકો તેમજ વાહન ચાલકો એકઠા થઈ ગયા હતા અને તુરંત જ
૧૦૮ એમ્બ્યુલન્સ દ્વારા બંને ઈજાગ્રસ્તોને ગાંધીનગર સિવિલ હોસ્પિટલ ખાતે ખસેડવામાં
આવ્યા હતા, જ્યાં
ફરજ પરના ડોક્ટરોએ કિશનકુમારને મૃત જાહેર કર્યો હતો. જ્યારે તેના મિત્ર સાવનની
હાલત ગંભીર જણાતા તેને વધુ સારવાર માટે અમદાવાદ સિવિલ હોસ્પિટલ ખાતે રિફર કરવામાં
આવ્યો છે. આ અંગે મૃતક કિશનકુમારના પિતા રમેશભાઈએ આ મામલે ચિલોડા પોલીસ મથકે
અજાણ્યા કાર ચાલક વિરુદ્ધ ફરિયાદ નોંધાવી છે.
