– એસએમસીની રેડ બાદ પોલીસ તંત્ર દોડતું થયું
– જુગારનું સાહિત્ય, રોકડ રકમ રૂ. 54 હજારથી વધુની મત્તા જપ્ત, જો-તે પોલીસ સ્ટેશનમાં ગુનો
નડિયાદ : ખેડા જિલ્લાના ભલાડામાં એસએમસીએ માતરના ભાજપના ધારાસભ્યના ભત્રીજાના જુગારધામ પર દરોડો પાડયા બાદ શંકાના દાયરામાં આવેલું પોલીસ તંત્ર સક્રિય બન્યું છે. જેમાં પોલીસે વાસણા બુઝર્ગ, નડિયાદ મરીડા ભાગોલ અને મહુધામાં જુગાર રમતા ૧૬ શખ્સોને જુગાર રમવાનું સાહિત્ય અને રોકડ રૂ.૫૪,૮૩૦ સાથે ઝડપી પાડયા હતા. આ બનાવ અંગે જે-તે પોલીસ મથકમાં જુગારધારા હેઠળ ગુનો નોંધવામાં આવ્યો છે.
ખેડા ટાઉન પોલીસ રવિવારે સાંજે પેટ્રોલિંગમાં નીકળી હતી. આ દરમિયાન બાતમી મળી હતી કે, વાસણા બુજર્ગ સીમમાં ખુલ્લા ખેતરમાં કેટલાક લોકો પોતાના ફાયદા માટે હાર જીતનો પત્તાપાનાનો જુગાર રમી રહ્યાં છે. જેથી પોલીસે રેડ પાડતા જુગાર રમતા લોકોએ નાસભાગ કરી મૂકી હતી. આ દરમિયાન પોલીસે કોર્ડન કરી જુગાર રમતા ઝેણાભાઈ બબાભાઈ પરમાર, સુરેશભાઇ નારાયણભાઇ ઠક્કર, મુકેશભાઈ ડાહ્યાભાઈ પરમાર, હિતેશભાઇ શનાભાઇ પટેલને રોકડ તેમજ જુગાર રમવાના સાધનો સાથે પોલીસે ઝડપી પાડયા હતા. જ્યારે દશરથભાઈ મનુભાઈ પરમાર, રામાભાઇ રમણભાઇ અને અંબુભાઈ બબાભાઇ નાસી ગયા હતા. પોલીસે સ્થળ ઉપરથી દાવ પર તેમજ અંગજડતીમાંથી રોકડા રૂ.૧૪૦૦ તેમજ જુગાર રમવાનું સાહિત્ય જપ્ત કર્યું હતું. આ બનાવ અંગે ખેડા ટાઉન પોલીસે ગુનો નોંધી વધુ કાર્યવાહી હાથ ધરી હતી
જ્યારે બીજા બનાવમાં નડિયાદ ટાઉન પોલીસે મળેલી બાતમી આધારે નડિયાદ મરીડા ભાગોળ, શાળા નંબર ૪૨ પાસે ખુલ્લામાં રમાતા જુગાર પર દરોડો પાડતા પત્તા પાનાનો જુગાર રમતા આસીફ મહેબુબભાઇ ગેલાના, શહેબાઝ રફીકભાઇ શેખ, ફારૂક ઉસ્માન વ્હોરા, સાજીદ અનવરભાઇ ખલીફા તેમજ સાહીલભાઈ સલીમભાઇ ખાનજીને પોલીસે જુગાર રમવાના સાધનો તેમજ રોકડ રૂ.૩,૦૪૦ સાથે ઝડપી પાડયા હતા. આ બનાવ અંગે નડિયાદ ટાઉન પોલીસે જુગાર ધારા હેઠળ ગુનો નોંધી વધુ કાર્યવાહી હાથ ધરી હતી. જ્યારે મહુધા પોલીસે રિવાવારની રાત્રે મળેલી બાતમી આધારે મહુધા જુમ્મા મસ્જિદ પાછળ રમાતા જુગાર પર દરોડો પાડતા જુગાર રમતા તોફીકબેગ લતીફબેગ મિર્ઝા, લીયાકતમીયા બાબૂમીયા મલેક, મકસુદબેગ મહંમદબેગ મિર્ઝા, હસનેનરઝા મહંમદરીયાઝ મલેક, મોસીનખાન હબીબખાન ૫ઠાણ, ઝાકીરમીયા કાલુમીયા મલેક અને સિકંદરખાન મહંમદખાન પઠાણને પત્તા પાના જુગાર રમવાનું સાહિત્ય તેમજ રોકડ રૂ.૨૩,૩૯૦ સાથે ઝડપી પાડયા હતા. આ બનાવ અંગે મહુધા પોલીસે ગુનો નોંધી વધુ કાર્યવાહી હાથ ધરી હતી.
