રાજકોટની નવી કોર્ટ બિલ્ડિંગ પાસે હીટ એન્ડ રન : મર્ડરનાં ગુનામાં 2 વર્ષથી જેલમાં બંધ શખ્સ સાથે તેના પુત્રને મળાવવા ફઇ જતી હતી તે વખતે અકસ્માત
રાજકોટ, : ખૂનનાં ગુનામાં જેલમાં બંધ પિતા કોર્ટ મુદ્દતે આવતા હોવાથી તેને મળવા ગયેલા સાડા ચાર વર્ષનાં પુત્રનો કાર ચાલકે ભોગ લીધો હતો. જામનગર રોડ પાસે નવી કોર્ટ બિલ્ડિંગ સામે સવારે સર્જાયેલા આ અકસ્માત બાદ કાર ચાલક ભાગી ગયો હતો. ગાંધીગ્રામ-2 પોલીસે તેના વિરૂદ્ધ ગુનો નોંધી તપાસ હાથ ધરી છે.
નાગેશ્વર બસ સ્ટેન્ડની પાછળ ઝુપડપટ્ટીમાં રહેતા વસંતબેન જખાનીયા (ઉ.વ. 27)એ પોલીસને જણાવ્યું કે, તેનો ભાઇ નિતેશ છેલ્લા બે વર્ષથી પોપટપરા જેલમાં છે. જ્યારે નિતેશની પત્ની નીરા છેલ્લા એકાદ માસથી ક્યાંક જતી રહેતા તેનો પુત્ર રાજ (ઉ.વ. સાડા ચાર વર્ષ) તેની સાથે રહેતો હતો. તેના ભાઇ નિતેશની આજે કોર્ટમાં મુદ્દત હતી. જેથી તેના પુત્ર રાજને તેની સાથે મળાવવા માટે નીકળી હતી.
નવી કોર્ટ બિલ્ડિંગ પાસે પગપાળા જતી હતી ત્યારે કાળા કલરની કારે રાજને પાછળથી હડફેટે લીધો હતો. જેથી રાજ રોડની વચ્ચેના ડીવાઇડર તરફ ભટકાતા માથામાં અને શરીરમાં ગંભીર ઇજા થઇ હતી. જેથી તેને રિક્ષામાં બેસાડી સિવિલ લઇ ગયા હતા. જ્યાં તબીબે મૃત જાહેર કર્યો હતો.
અકસ્માત સર્જ્યા બાદ ચાલક નવી કોર્ટ તરફ જતો રહ્યો હતો. કારનાં નંબર તેણે પોલીસને આપ્યા છે. જોકે સીરીઝ જોઇ શક્યા ન હતા. ગાંધીગ્રામ-2 પોલીસે કાર નંબરના આધારે ચાલકની શોધખોળ શરૂ કરી છે. મૃતક રાજ ત્રણ ભાઇ અને એક બહેનમાં બીજા નંબરનો હતો.
