Ahmedabad Crime News: અમદાવાદ શહેરમાં કાયદાનો ડર જાણે ઓસરી રહ્યો હોય તેમ પોલીસકર્મીઓ પર હુમલાની ઘટનાઓ વધી રહી છે. આનંદનગર વિસ્તારમાં બંદોબસ્તમાં તહેનાત એક હેડ કોન્સ્ટેબલ પર કમલસિંહ પરમાર નામના શખસે હુમલો કરી ગંભીર ઇજાઓ પહોંચાડી હતી. આટલેથી ન અટકતા, આરોપીએ પોલીસ સ્ટેશનમાં જઈને સીસીટીવીના ટીવી સાથે માથું ભટકાડી તોડફોડ કરી પોલીસને જ ખોટા કેસમાં ફસાવવાની ધમકી આપી હતી.
બંદોબસ્ત દરમિયાન હિંસક હુમલો
મળતી માહિતી અનુસાર, 11મી એપ્રિલના રોજ હેડ કોન્સ્ટેબલ જયવીરસિંહ અને ડ્રાઈવર વિક્રમસિંહ ગોપાલ આવાસ ઔડાના ગેટ પાસે ફરજ પર હતા. અગાઉ આરોપીના ભાઈ વિજય પરમારે ડૉ. બાબાસાહેબ આંબેડકરના ધ્વજને નુકસાન પહોંચાડ્યું હોવાથી વિસ્તારમાં શાંતિ જળવાય તે માટે પોલીસ બંદોબસ્ત મૂકવામાં આવ્યો હતો. સવારે 11 વાગ્યે આરોપી કમલસિંહે એક દુકાનદાર સાથે ઝઘડો શરૂ કર્યો હતો, જેમાં સમજાવવા ગયેલી પોલીસ પર તે ઉશ્કેરાયો હતો.
આ પણ વાંચો: સ્થાનિક સ્વરાજ્ય ચૂંટણીની અવનવી ઘટનાઓ, ક્યાંક સામૂહિક રાજીનામા તો ક્યાંક નેતાઓ રડ્યાં
પોલીસને બચકાં ભર્યા અને અંગૂઠો મરડી નાખ્યો
આરોપી કમલસિંહે હેડ કોન્સ્ટેબલ જયવીરસિંહ સાથે ઝપાઝપી કરી હતી અને પેટના ભાગે લાત મારી અને જમણા હાથના અંગૂઠા પર બચકું ભરી લીધું હતું. પોલીસ ગાડીમાં બેસાડતી વખતે આરોપીએ જયવીરસિંહના ડાબા હાથના અંગૂઠાને મરડી નાખી ઈજા પહોંચાડી હતી. પોલીસ સ્ટેશન જતા રસ્તામાં આરોપીએ ‘તમારા પટ્ટા-ટોપી ઉતરાવી દઈશ’ તેવી ધમકીઓ આપી હતી.
પોલીસ સ્ટેશનમાં તોડફોડ
પોલીસ સ્ટેશન પહોંચ્યા બાદ આરોપી વધુ હિંસક બન્યો હતો. સર્વેલન્સ સ્ક્વોડની રૂમમાં તેણે પોલીસને ફસાવવા માટે પોતાની જાતે સીસીટીવીના મોનિટર (ટીવી) સાથે માથું ભટકાડ્યું હતું. આ ઘટનામાં ટીવીની ડિસ્પ્લે તૂટી જવાથી સરકારી મિલકતને અંદાજે 50 રૂપિયાનું નુકસાન થયું હતું.
હુમલામાં ઈજાગ્રસ્ત હેડ કોન્સ્ટેબલે સોલા સિવિલ હોસ્પિટલમાં સારવાર લીધા બાદ આરોપી કમલસિંહ ભરતસિંહ પરમાર સામે સરકારી ફરજમાં રૂકાવટ, હુમલો અને સરકારી મિલકતને નુકસાન પહોંચાડવા બદલ કાયદેસરની ફરિયાદ નોંધાવી છે. પોલીસે આ મામલે આરોપીની અટકાયત કરી વધુ તપાસ હાથ ધરી છે.
