Kheda News: ડિજિટલ યુગમાં જ્યાં દરેક વ્યક્તિની ઓળખ તેની બાયોમેટ્રિક વિગતો પર નિર્ભર છે, ત્યારે ખેડા જિલ્લાના ઠાસરા તાલુકાના વલ્લભપુરા ગામની બે સગી બહેનો આધાર નંબર એક જ હોવાની સામે આવી છે. બંને બહેનો અલગ-અલગ વ્યક્તિ હોવા છતાં સરકારી ચોપડે માત્ર એક જ વ્યક્તિ તરીકે ઓળખાય છે.
ઠાસરામાં બે સગી બહેનોને અપાયો એક જ આધાર નંબર!
મળતી માહિતી મુજબ, ઠાસરાના વલ્લભપુરા ગામની મીનાબેન અને મનીષાબેન બંનેની શારીરિક ઓળખ, ચહેરો અને તેમના ફિંગરપ્રિન્ટ્સ અલગ-અલગ હોવા છતાં, આધારની સિસ્ટમમાં થયેલી કોઈ મોટી ખામીને કારણે બંનેને એક જ યુનિફાઈડ નંબર ફાળવી દેવામાં આવ્યો છે. આ કિસ્સો તંત્રની ઘોર બેદરકારીનો અદભુત નમૂનો છે.
સુધારા કરાવ્યા છતાં પરિણામ શૂન્ય
આઘાર નંબરના ખામીને લઈને બંને બહેનોએ જણાવ્યા હતું કે, ‘આ ભૂલ સુધારવા માટે અમે અનેકવાર સરકારી કચેરીઓના ધક્કા ખાધા છે. દર વખતે સુધારાની પ્રક્રિયા કરવામાં આવે છે, નવા કાર્ડ પણ ઘરે આવે છે, પરંતુ કમનસીબી એ છે કે દરેક વખતે કાર્ડ પર આધાર નંબર તો એનો એ જ જૂનો છપાઈને આવે છે. આ ભૂલને કારણે સરકારી સહાય, બેંકિંગ સુવિધાઓ અને અન્ય મહત્ત્વના કામોમાં મુશ્કેલી પડી રહી છે.’
આ પણ વાંચો: મહીસાગરના કોઠંબામાં સગી દીકરીએ પ્રેમી સાથે મળીને માતાને મોતને ઘાટ ઉતારી, હત્યા છુપાવવા મૃતદેહ તળાવમાં ફેંક્યો હતો
તેમણે કહ્યું કે, ‘અમારા બંનેના ફિંગરપ્રિન્ટ અલગ છે, નામ અલગ છે, તો નંબર એક કેવી રીતે હોઈ શકે? શું અમારે આખી જિંદગી એક જ ઓળખ પર જીવવું પડશે? તંત્ર વહેલી તકે આનું નિરાકરણ લાવે તેવી અમારી માગ છે.’ આ ઘટનાએ ઠાસરા તાલુકા વહીવટી તંત્ર અને UIDAI વિભાગની કાર્યપદ્ધતિ સામે અનેક સવાલો ઉભા કર્યા છે.
