Jamnagar News: જામનગર શહેરમાં કાયદો અને વ્યવસ્થા જાળવવા માટે પોલીસ તંત્ર દ્વારા ગેરકાયદેસર પ્રવૃત્તિઓ કરતાં શખસો સામે સખત કાર્યવાહી કરવામાં આવી રહી છે. આ અંતર્ગત આજે(22 એપ્રિલ, 2026) સિટી ‘એ’ ડિવિઝન પોલીસ સ્ટેશન વિસ્તારમાં ગુજસીટોકના આરોપીઓ દ્વારા કરવામાં આવેલા જમીન દબાણ સામે મહત્ત્વપૂર્ણ એક્શન લેવામાં આવ્યું હતું.
12,000 ચોરસ ફૂટ જમીન પર ગેરકાયદે દબાણ
માહિતી મુજબ, શહેરના ટિટોડીવાડી વિસ્તારમાં પૂર્વ કોર્પોરેટર અલતાફ ખફી અને તેમની ગેંગ દ્વારા આશરે 12,000 ચોરસ ફૂટ જેટલી જમીન પર ગેરકાયદે દબાણ કરવામાં આવ્યું હતું. આ બાબત પોલીસના ધ્યાનમાં આવતાં તાત્કાલિક કાર્યવાહી હાથ ધરવામાં આવી હતી.
ગેરકાયદે દબાણ દૂર કરાયું
આ મામલે જામનગર શહેર પોલીસની ટીમ દ્વારા સ્થળ પર પહોંચી કાર્યવાહી હાથ ધરવામાં આવી હતી. જેમાં જેસીબી સહિતના મશીનોની મદદથી ગેરકાયદે બાંધકામ અને દબાણ દૂર કરવામાં આવ્યું હતું.
આ પણ વાંચો: પંચમહાલ: મતદારોને પૈસાનું પ્રલોભન આપવા મામલે AAPના કાર્યકરો વિરુદ્ધ ફરિયાદ, ઉમેદવારે આક્ષેપો ફગાવ્યા
કાર્યવાહી દરમિયાન કોઈ અનિચ્છનીય બનાવ ન બને તે માટે પૂરતો પોલીસ બંદોબસ્ત ગોઠવવામાં આવ્યો હતો અને સમગ્ર પ્રક્રિયા શાંતિપૂર્ણ રીતે પૂર્ણ કરવામાં આવી હતી. પોલીસ અધિકારીએ જણાવ્યું હતું કે, શહેરમાં ગુંડાગીરી, ગેરકાયદે દબાણ અને અન્ય ગુનાહિત પ્રવૃત્તિઓ સામે આવનારા સમયમાં પણ આ જ પ્રકારની કડક કાર્યવાહી ચાલુ રાખવામાં આવશે.
