સતત બીજા દિવસે ભરઉનાળે ચોમાસાનો માહોલ ભારે પવનથી વૃક્ષો પડી ગયાં, કેરીઓ ખરી પડી, ગામડાઓમાં પાણી વહેતા થયા, ખેડૂતોમાં ચિંતાનું મોજું
ઊના, ધોકડવા, : ઊના અને ગીરગઢડા પંથકમાં આજે મિનિ વાવાઝોડા સાથે ધોધમાર વરસાદ વરસ્યો હતો. ગઈકાલે તુલસીશ્યામ અને આસપાસના વિસ્તારોમાં વરસાદ પડયા બાદ આજે બીજા દિવસે પણ પંથકમાં ભર ઉનાળે ચોમાસાનો માહોલ જોવા મળ્યો હતો. ગ્રામ્ય વિસ્તારોમાં ભારે પવનથી વૃક્ષો પડી ગયા હતા. તેમજ કેરીઓ ખરી પડતા ખેડૂતોને નુકસાની સહન કરવી પડશે.
દક્ષિણ-પશ્ચિમ તરફના ભેજવાળા પવનને લીધે ઊના-ગીરગઢડા પંથકમાં સતત બીજા દિવસે ભર ઉનાળે ચોમાસા જેવો માહોલ સર્જાયો છે. ગઈકાલે તુલસીશ્યામ અને આસપાસના વિસ્તારોમાં વરસાદ પડયા બાદ આજે ફરી વાતાવરણમાં પલટો આવવા સાથે બપોરના ત્રણ વાગ્યા પછી મીની વાવાઝોડા સાથે ધોધમાર વરસાદ વરસવો શરૂ થયો હતો. ઊના શહેર તેમજ ગીરગઢડા તાલુકાના વાજડી, ધોકડવા, બેડીયા, મોતીસર, હરમડીયા, પીછવી, એભલવડ, બાબરીયા, થોરડી, નાના-મોટા સમઢીયાળા, બંધારડા સહિતના ગામોમાં એક કલાક સુધી વરસાદ વરસતા રસ્તા પર પાણી વહેતા થયા હતા. ભારે પવનને ગ્રામ્ય વિસ્તારોમાં અનેક જગ્યાએ વૃક્ષો પડી ગયા હતા. પવન ફૂંકાવાના કારણે આંબાના ઝાડ પરથી કેરીઓ ખરી ગઈ હતી. ઉનાળાની તુમાં કમોસમી વરસાદ/માવઠાને લીધે તલ, માંડવીના પાક અને કેરીના ફાલને નુકસાન થવાની શકયતાથી ખેડૂતોમાં ચિંતાનું મોજું છવાયું છે.
ધોકડવા પાસે ટ્રાન્સફોર્મર પર વીજળી પડતાં વીજ પુરવઠો ખોરવાયો
ધોકડવા ગામના બાયપાસ પાસે ટ્રાન્સફોર્મર પર વીજળી પડતા વીજ પુરવઠો ખોરવાયો હતો. જ્યારે ઊનામાં પણ ભારે પવનથી એક કલાક સુધી વીજ પુરવઠાને અસર થઈ હતી.
