Vadodara Power Cut : વડોદરા શહેરના છેવાડે આવેલા છાણી બી સ્ટેશનમાં જેટકો દ્વારા જરૂરી રીપેરીંગ અંગે શટડાઉનની કામગીરી હોવાથી વિવિધ વિસ્તારમાં તા.10, રવિવારે સવારે 6થી 10 વાગ્યા સુધી વીજ પુરવઠો બંધ રહેશે. રીપેરીંગ કામ પૂરું થયા બાદ વીજ પુરવઠો અગાઉની કોઈપણ જાતની જાણ કર્યા વિના શરૂ કરી દેવાશે.
હાલમાં ઉનાળાની ત્રાહિમામ ગરમી 41 અંશ ડિગ્રી પાર કરી ગઈ છે ત્યારે, લાઈટ-પંખા, એસી વિના કોઈપણ સમયે રહેવું શક્ય નથી આમ છતાં પણ વીજ રીપેરીંગ અંગે દિવસ ઉગતા જ ચાર કલાક પુરવઠા વિના રહેવું લોકો માટે ત્રાહિમામ સમાન કહી શકાય.
ઉલ્લેખનીય છે કે શહેરના છેવાડે છાણી-બી સબ સ્ટેશનમાં જરૂરી રીપેરીંગ કામ 11 કેવી (બસ-2 અને 3) શતડાઉન માટેની કામગીરી અંગે તા.10, રવિવારે વીજ પુરવઠો સવારે 6થી 10 વાગ્યા સુધી બંધ રહેશે. જેમાં ફતેગંજ સબ ડિવિઝન આવરણ ફીડર આસપાસનો વિસ્તાર, અંજલી ફીડર આસપાસનો વિસ્તાર, આશાપુરી ફીડર અને તેનો આસપાસનો વિસ્તાર એવી જ રીતે ધરમશી ફીડર અને તેની આસપાસનો વિસ્તાર તથા સરદાર નગર ફીડર સહિત સમાજ સબ ડિવિઝન, પાણીની ટાંકી ફીડરના આસપાસના વિસ્તારનો સમાવેશ થાય છે. વીજ રીપેરીંગ કામકાજ પૂરું થયા બાદ અગાઉથી કોઈપણ જાતની જાણ કર્યા વિના વીજ પુરવઠો શરૂ કરી દેવાશે તેમ વિશ્વામિત્રી પશ્ચિમ વિભાગના કાર્યપાલક ઇજનેર દ્વારા જણાવાયું હતું.
