Surat Limbayat Case: સુરતના લિંબાયત વિસ્તારમાં નજીવી બાબતે કિશોરની હત્યા કરી ફરાર થઈ ગયેલા રીઢા ગુનેગાર રાહુલ જોગીને પકડવા ગયેલી પોલીસ પર હુમલો થતા, પોલીસે સ્વબચાવમાં ફાયરિંગ કર્યું હતું. આ ‘હાફ એન્કાઉન્ટર’માં આરોપીના પગમાં ગોળી વાગતા તે ફસડાઈ પડ્યો હતો. પોલીસે આરોપીને દબોચી લઈ સિવિલ હોસ્પિટલ ખસેડ્યો છે.
શું હતી સમગ્ર ઘટના?
મળતી માહિતી અનુસાર, ગત 10મી મેની રાત્રિએ લિંબાયત વિસ્તારમાં 17 વર્ષીય અનુરાગ ઉર્ફે રાજ પવાર પોતાના મિત્ર સાથે બાઈક પર જઈ રહ્યો હતો. ગણેશ નગર પાસે આરોપી રાહુલ જોગીની બાઈક સાથે ટક્કર થતા બંને વચ્ચે બોલાચાલી થઈ હતી. ઉશ્કેરાયેલા રાહુલે ચપ્પુના ઘા અનુરાગની છાતીમાં ઝીંકી દીધા હતા, જેમાં કિશોરનું કરુણ મોત નીપજ્યું હતું.
આ પણ વાંચો: વલસાડમાં ગરીબી-લાચારી સામે હારેલા પરિવારે સામૂહિક ‘ઈચ્છા મૃત્યુ’ ની માગ કરી, કલેક્ટરને લખ્યો પત્ર
પોલીસ પર હુમલો અને વળતું ફાયરિંગ
હત્યા બાદ ફરાર આરોપી મીઠીખાડી વિસ્તારમાં છુપાયો હોવાની બાતમી મળતા લિંબાયત પી.આઈ. ડી.ડી. ચૌહાણની ટીમ વહેલી સવારે દરોડો પાડવા પહોંચી હતી. ધરપકડથી બચવા રાહુલે પોલીસ કોન્સ્ટેબલ મુકેશ બાગુલ પર ચપ્પુ વડે હુમલો કર્યો હતો. પરિસ્થિતિ વણસતા પી.આઈ. ચૌહાણે પોતાની સર્વિસ રિવોલ્વરથી 2 રાઉન્ડ ફાયરિંગ કર્યું હતું. જેમાં એક ગોળી આરોપીના જમણા પગમાં વાગતા તે નીચે પડી ગયો હતો અને પોલીસે તેને ઝડપી પાડ્યો હતો. હાલમાં ઈજાગ્રસ્ત કોન્સ્ટેબલ મુકેશ બાગુલ ગોધાદરાની ખાનગી હોસ્પિટલમાં સારવાર હેઠળ છે.
કોણ છે રાહુલ જોગી?
28 વર્ષીય રાહુલકુમાર સંજયનાથ જોગી શહેર પોલીસ માટે માથાનો દુ:ખાવો બન્યો છે. તેની સામે લૂંટ, ચેઈન સ્નેચિંગ, અને મારામારી સહિત અત્યાર સુધીમાં 17 જેટલા ગંભીર ગુનાઓ નોંધાયેલા છે. તેની ગુનાહિત પ્રવૃત્તિઓ ડામવા માટે અત્યાર સુધીમાં 3 વખત પાસા હેઠળ જેલભેગો કરવામાં આવ્યો છે. હાલમાં તેની સામે ભારતીય ન્યાય સંહિતા (BNS) 2023ની વિવિધ કલમો હેઠળ ગુનો નોંધવામાં આવ્યો છે.
હોસ્પિટલમાં આરોપીના સૂર બદલાયા
જ્યારે પોલીસ આરોપીને સારવાર માટે સિવિલ હોસ્પિટલ લાવી ત્યારે ગોળી વાગવાના દર્દથી તે કણસી રહ્યો હતો. જે રીઢો ગુનેગાર નિર્દોષની હત્યા કરતા ખચકાયો નહોતો, તે હોસ્પિટલના બિછાને ‘હવે ફરી આવું નહીં કરું’ કહી બુમો પાડી રહ્યો હતો. લિંબાયત પોલીસે સ્પષ્ટ સંકેત આપ્યો છે કે કાયદો હાથમાં લેનારા તત્વો સામે કડક હાથે કામ લેવામાં આવશે. આ ઘટનાથી લિંબાયત વિસ્તારના અસામાજિક તત્વોમાં ફફડાટ વ્યાપી ગયો છે.
