Vadodara Petrol Diesel Price Hike : પેટ્રોલ તેમજ ડીઝલના ભાવવધારાના પગલે વડોદરા શહેર તેમજ જિલ્લાના નાગરિકો પર રોજનો રૂા.40 લાખનો બોજો પડશે. આ ભાવવધારાથી વડોદરાના નાગરિકોએ રોજ હવે આટલી રકમ વધારાની પેટ્રોલપંપો પર ચૂકવવી પડશે.
વિધાનસભાની ચૂંટણીઓ પૂરી થતાં, જ અંદાજ મુજબ આખરે શુક્રવારે સવારે પેટ્રોલ અને ડીઝલના ભાવમાં ઓચિંતો વધારો નાંખી દેવાયો હતો અને શુક્રવારથી જ તેનો અમલ શરૂ કરી દેવામાં આવ્યો છે. પેટ્રોલ અને ડીઝલના ભાવ પ્રતિ લિટરે રૂા.3 વધી જતા તેની અસર હવે લોકોના બજેટ પર પડશે તે નિશ્ચિત છે. વડોદરા શહેરમાં સરકારી ઓઈલ અને ખાનગી ઓઈલ કંપનીઓના કુલ 143 પેટ્રોલપંપો છે. શહેર અને જિલ્લામાં કુલ 275 પેટ્રોલપંપો છે. વડોદરા શહેર અને જિલ્લાના પોણા ત્રણસો પેટ્રોલપંપો પર રોજે રોજ જરૂરિયાત મુજબ પેટ્રોલ અને ડીઝલનો જથ્થો મંગાવવામાં આવે છે. સૂત્રોના જણાવ્યા મુજબ વડોદરામાં રોજ 13 લાખ પેટ્રોલ અને ડીઝલનું વેચાણ પેટ્રોલપંપો પરથી થતું હોય છે. વડોદરાની આસપાસ સરકારી ઓઈલ કંપનીઓની રિફાઈનરી સ્ટોરેજ શહેરમાં પેટ્રોલ અને ડીઝલની ડિલિવરી સરળતાથી થઈ જાય છે જ્યારે દૂરના વિસ્તારોમાં પૂરવઠો પહોંચતા મોડું થતું હોય છે.
વડોદરામાં રોજ 13 લાખ લિટર વેચાણમાં હવે પ્રતિ લિટરે ત્રણ રૂપિયાનો વધારો થતા આશરે રૂા.40 લાખ જેટલી રેવન્યૂ વેચાણમાં વધી ગઇ છે અને તેનો બોજ વાહનચાલકો પર આવી ગયો છે. એટલે કે એક મહિનામાં રૂા.12 કરોડ હવે લોકોએ પોતાના ખિસ્સામાંથી ઓઈલ કંપનીઓને ચૂકવવા પડશે. પેટ્રોલપંપ ડીલર એસોસિએશનના પ્રમુખે હતું કે પેટ્રોલ અને ડીઝલની કોઈ અછત નથી લોકોએ પેનિક થવાની જરૂર નથી.
ઈન્ડસ્ટ્રિયલ ડીઝલના ભાવ વધતા કેટલાંક પેટ્રોલપંપો પરથી થતા કાળાબજાર
ઈન્ડસ્ટ્રિયલ ઉપયોગ માટેના ડીઝલના ભાવમાં અગાઉ જ મોટો વધારો તેમજ છૂટકમાં જથ્થો નહી આપવાનો પરિપત્ર અગાઉ બહાર પાડવામાં આવ્યો હતો પરંતુ ત્યારબાદ વિરોધ થતાં બે દિવસ બાદ તેમાં સુધારો કરીને ખેડૂતો તેમજ સરકારી પ્રોજેક્ટો માટે ઉપયોગમાં લેવાતા ડીઝલનું વેચાણ કારબામાં આપવામાં આવશે તેવો ખુલાસો કરાયો હતો. મહત્વની બાબત એ છે કે ઈન્ડસ્ટ્રિયલ ડીઝલના ભાવમાં ઊંચો વધારો કરાયો હોવાથી કેટલાંક પેટ્રોલપંપોના સંચાલક ડીઝલ કાળાબજારમાં વેચતા હોવાની વિગતો બહાર આવી છે.
