Ahmedabad News: અમદાવાદ નજીક ગાંધીનગરની હદને અડીને આવેલા સાંતેજ ઇન્ડસ્ટ્રિયલ એરિયામાં શુક્રવારે સાંજે લાગેલી ભયાનક આગે ભારે તબાહી મચાવી છે. શુક્રવાર સાંજથી શરૂ થયેલી આગ પર કાબૂ મેળવ્યા બાદ, શનિવારે સવારે 7 વાગ્યે ફેક્ટરી પરિસરમાંથી એક વ્યક્તિનો મૃતદેહ મળી આવતા અરેરાટી વ્યાપી ગઈ છે. પ્રાથમિક અંદાજ મુજબ, આ આગના કારણે કંપનીને અંદાજે 80 કરોડ રૂપિયાનું મોટું આર્થિક નુકસાન થયું હોવાનું સામે આવ્યું છે.
ક્યાં થઈ ઘટના?
સાંતેજ ઇન્ડસ્ટ્રિયલ એરિયામાં આવેલી ફેઇથ ઇન્ડસ્ટ્રિયલ લિમિટેડ નામની કેમિકલ અને પ્લાસ્ટિક મેન્યુફેક્ચરિંગ ફેક્ટરીમાં શુક્રવારે સાંજે 05 વાગ્યે આગ લાગી હતી. શનિવારે સવારે ફેક્ટરીમાંથી એક અજાણ્યો મૃતદેહ મળી આવ્યો છે. જેને પોસ્ટમોર્ટમ અને ઓળખ માટે સ્થાનિક પોલીસને સોંપવામાં આવ્યો છે. આગ એટલી ભીષણ હતી કે તે બાજુમાં આવેલી ટેક્નો ઇન્સ્ટ્રુમેન્ટ ફેક્ટરીમાં પણ ફેલાઈ ગઈ હતી અને તેને પણ ભારે નુકસાન પહોંચાડ્યું છે. આગ બુઝાવવા માટે ફાયર બ્રિગેડના 15 વાહનો અને 98 જેટલા જવાનો તૈનાત કરવામાં આવ્યા હતા.
જ્વલનશીલ કેમિકલના કારણે આગ ઝડપથી ફેલાઈ
ફાયર ડિપાર્ટમેન્ટના જણાવ્યા અનુસાર, શુક્રવારે સાંજે 05 વાગ્યે કંટ્રોલ રૂમને આગ લાગવાનો કોલ મળ્યો હતો. થલતેજ અને ચાંદખેડા ફાયર સ્ટેશનની ટીમો તાત્કાલિક ઘટનાસ્થળે દોડી ગઈ હતી. ફેક્ટરીમાં કેમિકલ અને પ્લાસ્ટિકના ઉત્પાદન માટે રાખવામાં આવેલો અતિ જ્વલનશીલ કાચો માલ હાજર હોવાથી આગે મિનિટોમાં જ વિકરાળ સ્વરૂપ ધારણ કરી લીધું હતું, જેના કારણે આસપાસના કામદારોમાં ભારે નાસભાગ અને અફરાતફરી મચી ગઈ હતી.
આ પણ વાંચો : અમદાવાદ: 1.66 કરોડની ચોરીના કેસમાં નવો વળાંક, મહિલા આરોપીનો પોલીસ પર સોનું-રૂપિયા પડાવ્યાનો ગંભીર આક્ષેપ
15 વાહનો અને 98 જવાનોએ રાત-દિવસ એક કર્યા
આગની ગંભીરતાને જોતા તંત્ર દ્વારા મેગા સર્ચ અને ફાઇટીંગ ઓપરેશન શરૂ કરાયું હતું. આ ઓપરેશનમાં 20 કિલોલીટરની ક્ષમતા ધરાવતા 6 વોટર બાઉઝર, 1 ઇમરજન્સી મેડિકલ ટ્રાન્સપોર્ટ વ્હીકલ, 8 ફર્સ્ટ રિસ્પોન્ડર બોલેરો વાહનો કામે લગાડાયા હતા. ફાયર ટીમના 64 ફાયરમેન, 6 જમાદાર, 20 ડ્રાઇવર, 3 સબ-ઓફિસર, 3 સ્ટેશન ઓફિસર, 1 ડિવિઝનલ ફાયર ઓફિસર અને એડિશનલ ચીફ ફાયર ઓફિસર સહિત કુલ 98 લોકોએ કલાકોની ભારે જહેમત બાદ આગ પર સંપૂર્ણ કાબૂ મેળવ્યો હતો.
નુકસાનીનો આંકડો મોટો, તપાસ શરૂ
આ દુર્ઘટનામાં અન્ય કોઈ વ્યક્તિને ઈજા થઈ હોવાના અહેવાલ નથી. જો કે બીજા દિવસે વહેલી સવારે એક વ્યક્તિનો મૃતદેહ મળી આવ્યો છે. ફેક્ટરીની અંદર લાગેલી આગના કારણે મશીનરી અને કેમિકલનો જથ્થો બળીને ખાખ થઈ જતા કરોડોનું નુકસાન થયું છે. આગ લાગવાનું ચોક્કસ કારણ હજુ સુધી જાણી શકાયું નથી, પરંતુ પોલીસ અને ફોરેન્સિક (FSL) ની ટીમ દ્વારા ટેકનિકલ તપાસ હાથ ધરીને આગનું કારણ શોધવાના પ્રયાસો શરૂ કરવામાં આવ્યા છે.
