ઘેરૂ બનતું LPG ગેસ સંકટ તંગી, મંદી અને મોંઘવારી : 4 માસમાં રૂ. 1683નો બાટલો વધુ રૂ. 42 વધતા રૂ. 3103એ પહોંચી ગયો : બીજી તરફ વેચાણ 70 ટકા સુધી ઘટી જવા છતાં 25 ટકા જ સપ્લાયનો નિયમ
રાજકોટ, : કોમર્શીયલ ગેસ કે જેનો ઉપયોગ નાના કારખાનાઓથી માંડીને જમવાની થાળી વેચીને ગુજરાન ચલાવનારા હોટલ સંચાલકો, ફૂડ પાર્સલના ધંધામાંં થાય છે તેના ભાવમાં આજે વધુ રૂ. 42નો વધારો ઝીંકાતા 19 કિલો બાટલાનો નવો ભાવ રૂ. 3103 એ પહોંચી ગયો છે. યુધ્ધ પછી તા. 7 માર્ચથી આજ તા. 1 જૂન સુધીમાં કોમ.ગેસ સિલિન્ડરમાં 76 ટકાનો એટલે કે રૂ. 1343 નો વધારો થયો છે. અને ગત ચાર માસમાં રૂ. 1420નો તોતિંગ વધારો ઝીંકી દેવાતા ધંધાર્થીઓ અને હોટલ-રેસ્ટોરામાં જમતા લોકો પર મોંઘવારીનો બોજ વધી રહ્યો છે.
યુધ્ધ પછી એલ.પી.જી.ગેસનું સંકટ ઘેરૂ બની રહ્યું છે. આશ્ચર્યની વાત એ છે કે એક તરફ ગ્રાહકોને ગેસ ઓછો મળે તે માટે અનેકવિધ નિયંત્રણો મુકી દેવાયા છે. સૂત્રો અનુસાર પહેલાની જેમ હોટલ-રેસ્ટોરાં વગેરેને એજન્સી પર ફોન પર બૂક કરવાથી બાટલા મળતા નથી, ઓનલાઈન નોંધણીની પ્રક્રિયા કરાવવી પડે છે, તેમના સરેરાશ વપરાશ હોય તેના 25 ટકા લેખે અને ડેરી જેવા વ્યવસાયમાં 70 ટકા લેખે જ સપ્લાય કરાય છે.
રાજ્યમાં ફરી ચૂલા યુગ શરૂ થઈ ગયો છે. વપરાશકર્તાઓએ કોમ.ગેસ ઘટાડીને કોલસાના ચૂલા અને ઈલેક્ટ્રીક સગડી તરફ વળ્યા છે, હોટલોમાં માત્ર રોટલી ગેસના ચૂલા પર અને બાકી દાળ,શાક વગેરે સગડા પર થવા લાગ્યા છે. જેના કારણે કોમ.ગેસનું વેચાણ 70 ટકા જેટલું ઘટી ગયાનું સ્થાનિક ગેસ વિતરકો પાસેથી જાણવા મળે છે. આ ઉપરાંત ડોમેસ્ટીક ગેસ બાટલામાં પણ પી.એન.જી.લાઈન હોય તેને બાટલો નહીં, કે.વાય.સી.ફરજીયાત અર્થાત્ પરિવારના અન્યના નામે કનેક્શન ન હોવું જોઈએ, વગેરે નિયમોને લીધે તેમાં પણ 30 ટકા જેટલું વેચાણ ઘટયું છે. આમ, ઉપરથી ગેસ સપ્લાયમાં તંગી, સ્થાનિકે વેચાણમાં મંદી અને છતાં ભાવવધારાનો ડામ જારી છે.
