Gujarat Weather Forecast: ગુજરાતમાં પ્રી-મોન્સૂન એક્ટિવિટી વેગ પકડી રહી છે, જેના ભાગરૂપે આગામી દિવસોમાં રાજ્યના અનેક વિસ્તારોમાં ગાજવીજ અને તેજ પવન સાથે હળવાથી મધ્યમ વરસાદ પડવાની સંભાવના હવામાન વિભાગ દ્વારા વ્યક્ત કરવામાં આવી છે. હવામાન વિભાગ મુજબ, આવતીકાલે રવિવારે(7 જૂન)ના રોજ સૌરાષ્ટ્ર અને દક્ષિણ ગુજરાતના 10 જિલ્લામાં ગાજવીજ સાથે હળવા વરસાદની શક્યતા છે.
IMD અનુસાર, દક્ષિણ-પૂર્વ રાજસ્થાન અને તેને અડીને આવેલા ઉત્તર ગુજરાતના વિસ્તારો પર સમુદ્રની સપાટીથી 3.1 કિલોમીટરની ઊંચાઈએ એક સાયક્લોનિક સર્ક્યુલેશન સક્રિય છે, જેના કારણે વાતાવરણમાં ભેજનું પ્રમાણ વધ્યું છે. બીજી તરફ, નૈઋત્યનું ચોમાસું ગોવા અને બેંગલુરુ સુધી પહોંચી ચૂક્યું છે અને તે આગળ વધી રહ્યું છે. 7 જૂને અમરેલી, ભાવનગર, ગીર સોમનાથ, છોટાઉદેપુર, નર્મદા, સુરત, ડાંગ, તાપી, નવસારી, વલસાડમાં હળવાથી મધ્યમ વરસાદી રહેશે.
અમદાવાદમાં પારો 42 ડિગ્રી આસપાસ રહેશે
અમદાવાદ અને આસપાસના વિસ્તારોમાં આગામી 24 કલાક દરમિયાન આકાશ આંશિક રીતે વાદળછાયું રહેવાની શક્યતા છે. શહેરમાં મહત્તમ તાપમાન 42 ડિગ્રી સેલ્સિયસ આસપાસ નોંધાઈ શકે છે, જેના કારણે બપોરના સમયે ગરમી અને ઉકળાટનું વાતાવરણ રહેવાની શક્યતા છે. ગઈકાલે અમદાવાદમાં મહત્તમ તાપમાન 41.3 ડિગ્રી સેલ્સિયસ નોંધાયું હતું, જે સામાન્ય કરતાં 0.4 ડિગ્રી વધુ હતું.
8 થી 10 જૂનની આગાહી
આગામી 8 થી 10 જૂન દરમિયાન દક્ષિણ ગુજરાતના તાપી, ડાંગ, વલસાડ અને નવસારી જિલ્લામાં મેઘગર્જના સાથે હળવો વરસાદી માહોલ રહેશે.
11-12 જૂનની આગાહી
રાજ્યમાં આગામી 5 દિવસ સૌરાષ્ટ્ર અને દક્ષિણ ગુજરાતના સહિતના જિલ્લાઓમાં વરસાદની આગાહી છે. જેમાં આગામી 11-12 જૂનના રોજ છોટાઉદેપુર, નર્મદા, સુરત, ડાંગ, તાપી, નવસારી, વલસાડ, મહીસાગર, પંચમહાલ, ભરૂચ, વડોદરા, અમરેલી, ભાવનગર, ગીર સોમનાથ જિલ્લામાં ગાજવીજ સાથે હળવા વરસાદની શક્યતા છે.
