એસએમસીના દરોડાથી સ્થાનિક પોલીસમાં દોડધામ
યુકેનો વર્ચ્યુઅલ નંબર ધરાવતાં બુટલેગરે અમદાવાદના સપ્લાયર પાસેથી દારૂ મંગાવ્યો હતો, દારૂ હરિયાણાથી આવતો હતો
રાજકોટ: છેલ્લા ઘણા સમયથી રાજસ્થાનના સપ્લાયરો દ્વારા ગુજરાતમાં લાખો-કરોડોનો દારૂ સપ્લાય કરવામાં આવી રહ્યો છે. દારૂનો આટલો જંગી જથ્થો ગુજરાતની ચેકપોસ્ટ પસાર કરી કઈ રીતે ઘુસી જાય છે તેનો કોઈની પાસે જવાબ નથી. હરિયાણાથી ઘુસાડાયેલો રૂા.૧.પ૧ કરોડનો અંગ્રેજી દારૂ એસએમસીએ ગોંડલ નજીકથી ઝડપી લઈ ટ્રક ચાલકની ધરપકડ કરી છે. જોકે કયા બુટલેગરે આ દારૂનો જથ્થો મંગાવ્યો હતો તે વિશે એસએમસીને કોઈ માહિતી મળી નથી.
સામાન્ય રીતે એસએમસી રેડ કરે તેના પછી તપાસ સ્થાનિક કે બીજી કોઈ પોલીસને સોંપી દેવામાં આવે છે. પરંતુ આ કેસની તપાસ એસએમસી પોતે કરે તેવી શકયતા છે. એસએમસીના પીઆઈ આર. કે. કરમટા અને પીએસઆઈ વી. એન. જાડેજાએ ચોકકસ બાતમીના આધારે રાજકોટ-જૂનાગઢ હાઈ-વે પર ભરૂડી ટોલ પ્લાઝા નજીકથી આજે સવારે પસાર થયેલા ટ્રકને અટકાવી તલાશી લેતાં અંદરથી અંગ્રેજી દારૂની ૧૧પ૪ પેટી (૪૧પ૮૦ બોટલ) મળી આવી હતી. જેની કિંમત રૂા.૧.પ૧ કરોડ ગણી, ટ્રક, મોબાઈલ ફોન, રોકડ વગેરે સાથે કુલ રૂા.૧.૮૧ કરોડનો મુદ્દામાલ જપ્ત કર્યો હતો.
ધરપકડ કરાયેલા ટ્રક ચાલક ભુરારામ કાલુરામ સરન (રહે. રાજસ્થાન)એ આ દારૂનો જથ્થો હરિયાણાથી લઈ આવી રહ્યાની કબુલાત આપી હતી. રાજસ્થાનના ખેમારામ રાવતારામ બેનીવાલે આ દારૂનો જથ્થો મોકલ્યો હતો. તેને ઉપરાંત ટ્રકના માલીક રામનિવાસ ઉર્ફે રામલાલ મુલતારામ અને તેના ભાઈ સુનિલને પણ એસએમસીએ આરોપી બનાવ્યો છે.
જોકે દારૂનો આ જંગી જથ્થો કોણે મંગાવ્યો હતો તે વિશે કોઈ ચોકકસ માહિતી એસએમસીને મળી નથી પરંતુ પ્લસ-૪૪ નંબરના મોબાઈલ ધારકે આ દારૂનો જથ્થો મંગાવ્યો હતો. પ્લસ-૪૪ યુકેનો કોડ છે. તેના વર્ચ્યુઅલ નંબર ધારકને આરોપી બનાવાયો છે.
એસએમસીના સુત્રોએ જણાવ્યું કે જે ટ્રક ચાલક પકડાયો છે તે બે માસ પહેલાં પણ નવસારીમાં દારૂના જથ્થા સાથે પકડાયો હતો. તે વખતે આ જ ટ્રક હતો. જામીન પર છુટયા બાદ બીજી વખત પકડાયો છે. રનિંગ રેડ હોવાથી ગોંડલ તાલુકા પોલીસને તકલીફ નહીં પડે તેવું જાણકારોનું કહેવું છે. આમ છતાં નિયમ મુજબ ઈન્કવાયરી કરાવાય તેવી શકયતા નકારાતી નથી.
