Gujarat Weather Update: ગુજરાતમાં હાલ કાળઝાળ ગરમી અને અસહ્ય ઉકળાટ વચ્ચે હવામાન વિભાગે આગાહી જાહેર કરી છે. રાજ્યમાં એકતરફ મહત્તમ તાપમાન 40થી 42 ડિગ્રી સેલ્સિયસની આસપાસ નોંધાઈ રહ્યું છે, ત્યારે બીજી તરફ દક્ષિણ ગુજરાતના કેટલાક વિસ્તારો અને સૌરાષ્ટ્રમાં વરસાદી માહોલ જામવાની સંભાવના વ્યક્ત કરવામાં આવી છે. આગામી 12મીથી 14મી જૂન દરમિયાન રાજ્યના વિવિધ ભાગોમાં હળવાથી મધ્યમ વરસાદની અગાઉથી જ શક્યતા જોવામાં આવી રહી છે.
દક્ષિણ ગુજરાતમાં સાત દિવસ વરસાદી માહોલ
અમદાવાદ હવામાન વિભાગ ડાયરેક્ટર એ. કે. દાસના જણાવ્યાનુસાર, આઠમીથી 14મી જૂન દરમિયાન ગુજરાત રીજનના મુખ્યત્વે દક્ષિણ ગુજરાતના જિલ્લાઓ જેવા કે નવસારી, તાપી, ડાંગ, વલસાડ તેમજ દમણ અને દાદરા નગર હવેલીમાં હળવોથી મધ્યમ વરસાદ પડી શકે છે. શરૂઆતના પાંચ દિવસ બાદ વરસાદનો આ વ્યાપ વધશે અને ઉત્તર ગુજરાતના વિસ્તારો તરફ પણ વાદળછાયું વાતાવરણ અને વરસાદ જોવા મળી શકે છે. આ સમયગાળા દરમિયાન પવનની ગતિ પ્રતિ કલાક 15થી 25 કિલોમીટર જેટલી રહેવાની ધારણા છે.
આ પણ વાંચો: ગુજરાતમાં ‘સિઝેરિયન’નું પ્રમાણ વધ્યું, નોર્મલ પ્રસુતિ ભૂતકાળ બની, નેશનલ ફેમિલી હેલ્થ સરવેમાં ખુલાસો
સૌરાષ્ટ્રમાં 4 દિવસ સૂકું વાતાવરણ
સૌરાષ્ટ્ર પંથકમાં આગામી ચાર દિવસ સુધી હવામાન મુખ્યત્વે સૂકું રહેવાની સંભાવના છે. જોકે, ત્યારબાદ એટલે કે 12મીથી 14મી જૂન દરમિયાન અમરેલી, ભાવનગર અને ગીર સોમનાથ જિલ્લામાં હળવાથી મધ્યમ વરસાદી ઝાપટાં પડી શકે છે, જેને પગલે સ્થાનિક લોકોને ગરમીથી થોડી રાહત મળશે. સામાન્ય રીતે ગુજરાતમાં ચોમાસાની સત્તાવાર શરૂઆત 15મી જૂનની આસપાસ થતી હોય છે, પરંતુ ચોમાસાના આગમન અંગે હજુ સુધી ઇન્ડિયન મેટ્રોલૉજીકલ ડિપાર્ટમેન્ટ (IMD) દ્વારા કોઈ સત્તાવાર તારીખ જાહેર કરવામાં આવી નથી.
તાપમાનનો પારો યથાવત્ રહેશે
હવામાન વિભાગના જણાવ્યા મુજબ, આગામી સાત દિવસ દરમિયાન રાજ્યના મહત્તમ તાપમાનમાં કોઈ મોટો ફેરફાર થવાની શક્યતા નથી. દરિયાકાંઠાના વિસ્તારોમાં પવન દક્ષિણ-પશ્ચિમથી પશ્ચિમ દિશામાં 15થી 20 નોટ્સની ગતિએ ફૂંકાશે, જે ક્યારેક વધીને 25 નોટ્સ સુધી પહોંચી શકે છે.
રાજ્યના પ્રમુખ શહેરોમાં નોંધાયેલા તાપમાન પર નજર કરીએ તો, સૌથી વધુ તાપમાન રાજકોટ અને અમદાવાદમાં 41.9 ડિગ્રી સેન્ટીગ્રેડ, સુરેન્દ્રનગરમાં 41.5 ડિગ્રી, ગાંધીનગરમાં 41 ડિગ્રી અને વીવી નગરમાં 3.3 ડિગ્રી સેન્ટીગ્રેડ નોંધાયું છે.
ચોમાસા પૂર્વેની આ ડબલ ઋતુની સ્થિતિને કારણે મિશ્ર વાતાવરણનો અનુભવ થઈ રહ્યો છે, જ્યાં બપોરે આકરી ગરમી અને સાંજે પવન સાથે વરસાદી માહોલ સર્જાઈ રહ્યો છે.
