આજે મ્યુનિ.કોર્પોરેશનની સ્થાયી સમિતિની બેઠકમાં નિર્ણય હેતુ રજૂ થયેલા ૧૨ પૈકીના બે કામો અંગે વિપક્ષ અને સામાજિક કાર્યકરે વાંધો ઉઠાવી કામો નામંજૂર કરવા તથા મુલતવી રાખવા રજૂઆતો કરી હતી. જો કે સમિતિએ એક કામને મુલતવી રાખી વિવાદિત સહિતની બાકી તમામ દરખાસ્તોને મંજૂરી આપી છે.
વિપક્ષે પાનમ યોજના અંતર્ગત રૂા.૧૦૩૯.૫૪ કરોડની ચૂકવણી અંગે મ્યુનિ.કોર્પોરેશન પર આર્થિક બોજો વધશે અને વિકાસ કામો પર અસર થશે તેવા સુચન સાથે કામ મુલતવી રાખવા તેમજ નિમેટાથી સરદાર એસ્ટેટ સુધી પાણીની નવી લાઈન નાખવા રૂટમાં ફેરફાર માટે કોન્ટ્રાક્ટરને વધુ રૂા.૯.૩૭ કરોડ ચૂકવવાની દરખાસ્ત નામંજૂર કરવા રજૂઆત કરી હતી.
જો કે આ કામોને મંજૂરી અપાઈ છે, જે અંગે સમિતિ ચેરમેનનું કહેવું છે કે સરકારનો આભાર માનવો જોઈએ વ્યાજ અને દંડ માફ કર્યા છે. અત્યારે તમામ રકમનું ચૂકવણું કરવાનું નથી, સમય છે એકાઉન્ટન્ટ સાથે ચર્ચા કરી પ્લાનિંગ કરીશું, જ્યારે પાણીની લાઈન અંગે કહ્યું કે જૂના અને નવા બંને નક્શાનો અભ્યાસ કર્યો છે, લાઈન પસાર કરવાની બે સ્થળોની મંજૂરીના અભાવે પાણીની લાઈનનો રૂટ બદલવાની જરુરિયાત છે.
અત્રે ઉલ્લેખનીય છે કે એક તરફ મ્યુનિ.કોર્પોરેશનના સત્તાધીશો ઈલેક્ટ્રિક અને સીએનજી વાહનોની ખરીદી ૫૨ ભાર મૂકવાના દાવા કરે છે અને બીજીતરફ આજે સ્થાયી સમિતિએ રૂા.૫૭.૪૬ લાખના ખર્ચે ૮ નવા ડીઝલ વાહનો ખરીદવાની દરખાસ્તને મંજૂર આપવા અંગે અધ્યક્ષનું કહેવું હતુ કે વાહનો લાંબા રૂટ પર જવાના નથી, જેથી ઓછો ખર્ચ આવશે.
સમા ખાતેની રંગ અવધૂત શાળા રૂા.૧.૪૪ કરોડના ખર્ચે નવી બનાવવાના અંદાજિત ભાવથી ૦.૭૯ ટકા ઓછા મુજબનું ઈજારદાર રીયા કન્સ્ટ્રક્શનનું કામ નાણાંકીય વિચારણા માટે મુલતવી રાખવાનો નિર્ણય કરાયો છે.
