Railway Board Shifts Three Express Trains : અમદાવાદના ગાંધીગ્રામ રેલવે સ્ટેશનની કનેક્ટિવિટીને મોટો વેગ આપતા, રેલવે બોર્ડે 3 જોડી એક્સપ્રેસ ટ્રેનોના ટર્મિનલ પોઇન્ટને સાબરમતી રેલવે સ્ટેશનથી ગાંધીગ્રામ રેલવે સ્ટેશન પર શિફ્ટ કરવાની મંજૂરી આપી દીધી છે. આ ટ્રેનો હવે ગાંધીગ્રામથી ઉપડશે અને ત્યાં જ આવીને મુસાફરી પૂર્ણ કરશે, તેમજ આ ટ્રેનો રસ્તામાં ચાંદખેડા રોડ સ્ટેશન પર પણ ઉભી રહેશે.
રેલવે બોર્ડ દ્વારા 19 જૂન, 2026ના રોજ બહાર પાડવામાં આવેલા આદેશ અનુસાર, 14821/14822 જોધપુર-સાબરમતી એક્સપ્રેસ, 12547/12548 આગ્રા કેન્ટ-સાબરમતી એક્સપ્રેસ અને 22547/22548 ગ્વાલિયર-સાબરમતી એક્સપ્રેસનું ટર્મિનલ સાબરમતીથી બદલીને ગાંધીગ્રામ કરવામાં આવશે. પશ્ચિમ રેલવેને યોગ્ય તારીખથી આ ફેરફાર લાગુ કરવાનો નિર્દેશ આપવામાં આવ્યો છે.
રેલવે બોર્ડે પશ્ચિમ રેલવેને આ ફેરફારોની વ્યાપક પ્રસિદ્ધિ કરવા અને જો જરૂર પડે તો, શરૂઆતની સેવા સ્પેશિયલ ટ્રેન તરીકે ચલાવવા પણ સૂચના આપી છે. આ નિર્ણયથી અમદાવાદના મધ્ય ભાગમાં અને ત્યાંથી અન્ય સ્થળોએ મુસાફરી કરતા મુસાફરોને મોટો ફાયદો થવાની અપેક્ષા છે, કારણ કે આ સ્ટેશન મુખ્ય શહેરમાં આવેલું છે, અને જાહેર પરિવહન સાથે સારી રીતે જોડાયેલું છે.
