અમદાવાદ : ભારતીય રિઝર્વ બેંકની લિબરલાઇઝ્ડ રેમિટન્સ સ્કીમ (LRS) હેઠળ રેમિટન્સ ચાલુ નાણાકીય વર્ષ ૨૦૨૫-૨૬ (એપ્રિલથી ડિસેમ્બર) દરમિયાન ઘટયું છે. આ રકમ વાર્ષિક ધોરણે ૪.૧૨ ટકા ઘટીને ૨૧.૩૬ બિલિયન ડોલર થઈ છે, જે ગયા વર્ષના સમાન સમયગાળામાં ૨૨.૨૮ બિલિયન ડોલર હતી.
રિઝર્વ બેંકના તાજેતરના ડેટા અનુસાર, ડિસેમ્બર ૨૦૨૫માં રેમિટન્સ પણ વાર્ષિક ધોરણે ૨.૨૬ ટકા ઘટીને ૨.૨૬ બિલિયન ડોલર થઈ છે, જે ડિસેમ્બર ૨૦૨૪માં ૨.૩૦ બિલિયન ડોલર હતું. ડેટા અનુસાર, આ યોજના હેઠળ ખર્ચવામાં આવેલી સૌથી મોટી રકમ આંતરરાષ્ટ્રીય મુસાફરી પર છે, જે કુલ રકમના લગભગ ૬૦ ટકા છે.
એપ્રિલ-ડિસેમ્બર ૨૦૨૫ દરમિયાન મુસાફરી પાછળ ખર્ચવામાં આવેલ રકમ ૪.૯ ટકા ઘટીને ૧૨.૩૭ બિલિયન ડોલર થઈ ગઈ, જે ગયા વર્ર્ષના સમાન સમયગાળામાં ૧૩.૦૧ બિલિયન ડોલર હતી.
વિદેશમાં અભ્યાસ માટે મોકલવામાં આવતા રેમિટન્સમાં પણ નોંધપાત્ર ઘટાડો થયો, જે ગયા વર્ષના ૨.૨૦ બિલિયન ડોલરની સરખામણીમાં ૨૨.૩૫ ટકા ઘટીને ૧.૭૧ બિલિયન ડોલર રહ્યો હતો.
