Ahmedabad News: અમદાવાદના ચાંદખેડા વિસ્તારમાં આવેલી દિવાળી હોમ્સ સોસાયટીમાં એક કરુણ ઘટના સામે આવી છે, જેમાં ફ્લેટના ત્રીજા માળેથી પડી જવાથી 34 વર્ષીય મહિલાનું મોત નિપજ્યું છે. આ સમગ્ર ઘટના સોસાયટી પરિસરમાં લગાવેલા સીસીટીવી કેમેરામાં કેદ થઈ હતી. પોલીસે હાલમાં આકસ્મિક મૃત્યુનો કેસ નોંધીને વધુ તપાસ હાથ ધરી છે.
મળતી માહિતી અનુસાર, મૃતકની ઓળખ મૈત્રી શ્રીમાળી તરીકે થઈ છે, જે ચાંદખેડામાં આવેલા દિવાળી હોમ્સ હાઉસિંગ કોમ્પ્લેક્સમાં રહેતી હતી. બે દિવસ પહેલાં આ ઘટના બની હતી. મૈત્રી શ્રીમાળી અચાનક બાલ્કની વિસ્તાર તરફ ગઈ અને નીચે પડી ગઈ હતી. નીચે પટકાવાના કારણે તેને ગંભીર ઈજાઓ પહોંચતા તેનું ઘટનાસ્થળે જ મૃત્યુ થયું હતું.
આ પણ વાંચો: ચંડોળા બાદ ઈસનપુરમાં ગેરકાયદે દબાણો પર તવાઈ, 20થી વધુ જેસીબી સાથે AMCનો કાફલો તહેનાત
મોતનું કારણ જાણવા પોલીસે તપાસ શરૂ કરી
ચાંદખેડા પોલીસે જણાવ્યું હતું કે ફ્લેટમાંથી કોઈ સુસાઈડ નોટ મળી નથી, અને મહિલાના પડી જવા પાછળના ચોક્કસ કારણો હજુ સુધી અજ્ઞાત છે.
પોલીસ તપાસ કરી રહ્યા છે કે આ ઇરાદાપૂર્વકનું કૃત્ય હતું (આત્મહત્યા), અકસ્માત હતો કે પછી કોઈ અન્ય બાહ્ય પરિબળો સામેલ હતા. મૃતકના પરિવારના સભ્યો, પડોશીઓ અને તે સમયે બિલ્ડિંગમાં હાજર અન્ય લોકોના નિવેદનો નોંધવામાં આવી રહ્યા છે. આ અચાનક બનેલી દુર્ઘટનાથી સોસાયટીના રહેવાસીઓમાં આઘાત અને શોકનું વાતાવરણ છવાયું છે.
