Clinical Tial News : ફાર્મા ઉદ્યોગમાં ગુજરાતે કાઠુ કાઢ્યું છે ત્યારે અમદાવાદ શહેરમાં ગેરકાયદેસર ક્લિનિકલ ટ્રાયલનો ધંધો ફુલ્યો ફાલ્યો છે. ગરીબી અને બેરોજગારીને લીધે યુવાઓ જ નહી, મહિલાઓ પણ કેન્સર, માનસિક સહિત અન્ય રોગની દવા ખાઇને ક્લિનિક્લ ટ્રાયલ થકી પૈસા કમાવવા મજબૂર બની છે. છેલ્લાં ઘણાં વખતથી ગુજરાતમાં કલિનિક્લ ટ્રાયલ થકી ફાર્મા કંપનીઓ ઘૂમ કાળી કમાણી કરી રહી છે. ક્રાઇમ બ્રાન્ચે અમદાવાદ શહેરની બે ક્લિનિકલ રિસર્ચ સેન્ટરો પર તપાસ કરતાં એવો ખુલાસો થયો છેકે, પૈસાની લાલચમાં અભણ અને ગરીબો પર ગેરકાયેદસર રીતે ક્લિનિકલ ટ્રાયલ કરવામાં આવી રહ્યાં છે.
લગ્ન હોય, પૈસાની જરૂર પડે તો ગરીબો માટે ક્લિનિકલ ટ્રાયલ એક માત્ર ‘સહારો’
વિદેશમાં ફાર્મા કંપનીઓને ક્લિનિકલ ટ્રાયલ કરવું ઘણું મોધું પડે છે કેમકે, જાગૃતિને લીધે વોલિયન્ટર મો માંગ્યા દામ મેળવે છે. સાથે સાથે વોલિયન્ટરને જોઇતી સુવિધા આપવી પડે છે. ભારતમાં ઉલટુ છે. ગરીબી અને બેરોજગારીને લીધે લોકો સામે ચાલીને કલિનિકલ ટ્રાયલ માટે જાય છે. પરિણામે ફાર્મા કંપનીઓને ફાવતુ ફાવ્યુ છે.
છેલ્લાં ઘણાં વખતથી ક્લિનિકલ ટ્રાયલમાં ભાગ લેનારાં બેરોજગાર પુરુષો કરતાં મહિલાઓનું પ્રમાણ વઘ્યુ છે જે ચિંતાનો વિષય બન્યો છે. અભણ હોવાથી દવાની આડ અસર થાય તો ફાર્મા કંપની પાસેથી વળતર કેવી રીતે મેળવવું તેની ખબર હોતી નથી. આ કારણોસર જ એજન્ટોનો ડોળો મજૂર વર્ગ હોય તેવા વિસ્તારો પર મંડાયેલો હોય છે.
આ પણ વાંચો: ભાજપે મને મંત્રી બનાવવાની ઓફર કરી, કહ્યું – કેસરિયો ધારણ કરી લો, ચૈતર વસાવાનો ધડાકો
ક્રાઇમ બ્રાન્ચે ક્લિનિક્લ ટ્રાયલ મુદ્દે વેદા ક્લિનિક્લ રિસર્ચ પ્રા.લિ અને લેમડા થેરાપ્યુટિક રિસર્ચ પ્રા.લિમિટેડમાં તપાસ કરતાં એવો ચોંકાવનારો ખુલાસો થયો છેકે, રોજનું કમાઇને રોજનું ખાનારા ગરીબ પરિવારો એજન્ટોના નિશાને રહ્યાં છે. એજન્ટોને વ્યક્તિ દીઠ મસમોટુ કમિશન ચૂકવાય છે. એજન્ટ જ પૈસાની લાલચ આપી રીક્ષા અને કારમાં રિસર્ચ સેન્ટર સુધી લાવવામાં આવે છે.
સામાન્ય રીતે એક વ્યક્તિ વર્ષમાં બે-ત્રણ વાર ક્લિનિક્લ ટ્રાયલમાં ભાગ લઇ શકે પણ આ બંને કંપનીઓમાં એક જ વ્યક્તિ 20-20 વખત ક્લિનિકલ ટ્રાયલ કરાવી ચૂક્યાં છે. વારંવાર ક્લિનિકલ ટ્રાયલમાં જતાં વ્યક્તિને દવાની આડ અસર થાય તો તેને સારવાર આપીને ઘેર મોકલી દેવાય છે. વળતર જ અપાતુ જ નથી. આ ઉપરાંત ટૂંકમાં, કલિનિકલ ટ્રાયલના નિયમો ધરાર ઉલાળિયો કરવામાં આવે છે. ગરીબ-અભણોના ફોર્મ પર અંગૂઠા લઇ જાણબહાર સંમિત મેળવી લેવાય છે જેથી વળતર આપવુ પડે નહી. આ રિસર્ચ સેન્ટરો પર મંજૂરી વિના વિડીયો રેકોર્ડીંગ પણ કરવામા આવતુ હતુ.
મ્યુનિ. આરોગ્ય વિભાગે કાર્યવાહી કરવા ડ્રગ્સ વિભાગને પત્ર લખ્યો
છેલ્લાં ઘણાં વખતથી અમદાવાદમાં ક્લિનિકલ ટ્રાયલનો મુદ્દો ચર્ચાનો વિષય બન્યો છે. આજે જ્યારે શહેર ક્રાઇમ બ્રાન્ચે બે કંપનીના ક્લિનિક્લ રિસર્ચ સેન્ટર પર તપાસ કરી હતી. ત્યારબાદ અમદાવાદ મ્યુનિસિપલ કોર્પોરેશનના આરોગ્ય વિભાગે પણ રાજ્યના ફૂડ એન્ડ ડ્રગ વિભાગને પત્ર લખી ગેરકાયદેસર કલિનિકલ ટ્રાયલ કરી કસૂરવાર રિસર્ચ સેન્ટરો પર કડક શિક્ષાત્મક કાર્યવાહી કરવા ભલામણ કરી છે.
