Ahmedabad Police Office: કોમનવેલ્થ ગેમ્સની મંજૂરી પછી અમદાવાદ ઓલિમ્પિક સિટી બને તેવા સપનાં સાથે તૈયારીઓના દાવા થઈ રહ્યાં છે. ત્યારે વિધાનસભામાં એક પ્રશ્નના જવાબની ચર્ચા છે. અમદાવાદમાં પોલીસ અધિકારીઓ એરકન્ડિશન્ડ ઓફિસોમાં બિરાજમાન છે, પરંતુ પોલીસ ચોકીઓ ભાડાંના જૂના મકાનોમાં બેસે છે. શહેરની 11 પોલીસ ચોકી, એક પોલીસ સ્ટેશન અને એક એસીપી ઓફિસ ભાડાના મકાનોમાં ચાલી રહી છે. પોલીસ તંત્ર માટે ગુજરાત સરકારના રૂડા-રૂપાળા દાવા વચ્ચે પોલીસને મળતી પાયાની સુવિધાઓની સ્થિતિ દયનીય છે.
આ પણ વાંચો: ગુજરાત બોર્ડની ધો.10-12ની પરીક્ષાનો આજથી પ્રારંભ: 15.27 લાખ વિદ્યાર્થીઓ આપશે એક્ઝામ
પોલીસ ચોકીઓ ભાડાના જૂના મકાનમાં
અમદાવાદ શહેરમાં કાયદો-વ્યવસ્થા જાળવી રાખવા માટે કુલ 49 પોલીસ સ્ટેશન અને 14 ટ્રાફિક પોલીસ સ્ટેશન કાર્યરત છે. અતિ આધુનિક અને સુવિધાસભર સી.પી. ઓફિસમાં પોલીસ કમિશનર, સંયુક્ત પોલીસ કમિશનરોની એરકન્ડિશન્ડ ઓફિસો છે. શહેરના ટ્રાફિક સહિત 10 ડીસીપી અને 20 જેટલા એસીપીની કચેરીઓ ઉપરાંત મોટાભાગના પી.આઈ.ની ઓફિસો પણ એરકન્ડિશન્ડ અને સુવિધાપૂર્ણ છે. શહેરના 49 પોલીસ સ્ટેશનો અને 14 ટ્રાફિક પોલીસ સ્ટેશનો હેઠળ 200 જેટલી પોલીસ ચોકીઓ કાર્યરત છે.
વિધાનસભામાં પૂછાયેલા સવાલના જવાબમાં જણાવાયું છે કે, એક એસીપી ઉપરાંત એક પોલીસ સ્ટેશન તેમજ 11 પોલીસ ચોકીઓ ભાડાંના મકાનમાં ચાલે છે. આંચકારૂપ બાબત એ છે કે, પોલીસની 13 નાની-મોટી કચેરીઓ 10થી 55 વર્ષથી ભાડાંના મકાનમાં ચાલી રહી છે. પશ્ચિમ વિસ્તારના એ ડિવિઝન એસીપીની ઓફિસ 17 વર્ષથી ભાડાંની ઓરડીઓમાં ચાલી રહી છે. તો, ઝોન-7 ડીસીપી કચેરી પણ પ્રિ-ફેબ્રિકેટેડ ડોમમાં ચાલે છે. સરવાળે, અમદાવાદમાં પોલીસ અધિકારીઓની ઓફિસો એકન્ડિશન્ડ છે અને પોલીસ ચોકીઓ ભાડાંના જૂના મકાનમાં ચાલી રહી છે. વિધાનસભામાં જાહેર કરાયેલી વિગતો કરતાં વાસ્તવિક સ્થિતિ વધુ ચોંકાવનારી છે. શહેરમાં પોલીસ, ટ્રાફિક પોલીસ અને એસ.આર.પી.ની 200 જેટલી ચોકીઓ રસ્તા અને ફૂટપાથો ઉપર દબાણ કરીને મુકી દેવામાં આવી હોય તેવા અનેક કિસ્સા છે.
