Ahmedabad News: અમદાવાદના અસલાલી ઓવરબ્રિજ નજીક ગત મોડી રાત્રે અકસ્માત ઘટના સામે આવી છે. કાર અને બાઇક વચ્ચે થયેલી જોરદાર ટક્કરમાં બાઇકનો કુરચો બોલી ગયો હતો. આ અકસ્માતમાં 3 લોકો ગંભીર રીતે ઇજાગ્રસ્ત થયા છે, જેમને હાલ હોસ્પિટલમાં સારવાર અર્થે ખસેડવામાં આવ્યા છે.
રાત્રે 2:30 વાગ્યે સર્જાયો અકસ્માત
મળતી માહિતી મુજબ, આ અકસ્માત ગત રાત્રે આશરે 2:30 વાગ્યાની આસપાસ અસલાલી બ્રિજ નજીક સર્જાયો હતો. એક કાર અને બાઇક વચ્ચે ટક્કર એટલી જોરદાર હતી કે બાઇકના કુચ્ચેકુચ્ચા ઊડી ગયા હતા. અકસ્માત થતાં જ સ્થાનિક લોકો ઘટનાસ્થળે દોડી આવ્યા હતા અને તાત્કાલિક 108 એમ્બ્યુલન્સને જાણ કરી હતી. ઈજાગ્રસ્ત ત્રણેય લોકોને તુરંત જ હોસ્પિટલ ભેગા કરવામાં આવ્યા હતા, જ્યાં હાલ તેમની સારવાર ચાલી રહી છે. સદનસીબે આ ભયાનક અકસ્માતમાં કોઇ જાનહાનિ થઇ નથી.
અસલાલી પોલીસ સ્ટેશનના પી.આઇ.ના જમાવ્યાનુસાર, આ અકસ્માત મોડી રાત્રે અઢીથી ત્રણ વાગ્યાની આસપાસ થયો હતો. જેમાં ત્રણ લોકોને ઇજા પહોંચતા હોસ્પિટલમાં દાખલ કરવામાં આવ્યા છે અને સદનસીબે કોઇનું મોત નીપજ્યું નથી. હાલ આ મામલે પોલીસ મથકે ફરિયાદ નોંધવાની તજવીજ અને આગળની કાયદેસરની કાર્યવાહી હાથ ધરવામાં આવી છે.
