Ahmedabad News : અમદાવાદ શહેરના વિવાદાસ્પદ હાટકેશ્વર બ્રિજને તોડવાની કામગીરી દરમિયાન આજે સાંજે એક ગંભીર દુર્ઘટના સર્જાઈ હતી. મ્યુનિસિપલ કોર્પોરેશન દ્વારા નિયુક્ત કોન્ટ્રાક્ટરની લાપરવાહીને કારણે બ્રિજ નીચે રાખેલા રેતી અને કોંક્રિટના વિશાળ કોથળા એકાએક નીચે પડતા ત્યાં ઉભેલી એક શ્રમિક મહિલા ઈજાગ્રસ્ત થઈ હતી.
હાટકેશ્વર બ્રિજ ડિમોલિશનમાં મોટી બેદરકારી
હાટકેશ્વર ઓવરબ્રિજને તોડવા માટે હાલ અંતિમ તબક્કાની કામગીરી ચાલી રહી છે. મુખ્ય રોડ પરના બે સ્પાન તોડવા માટે કોન્ટ્રાક્ટર દ્વારા નીચે રેતી અને કોંક્રિટ ભરેલા મોટા પ્લાસ્ટિકના કોથળાનો થપ્પો મારવામાં આવ્યો હતો, જેથી બ્રિજ તોડતી વખતે કાટમાળ સીધો નીચે પડે. જોકે, આજે 10 માર્ચની સાંજે આ કોથળાઓ અચાનક ધસી પડ્યા હતા.
બ્રિજ નીચે લારી લઈને ઉભેલી એક મહિલા આ કોથળા નીચે દબાઈ ગઈ હતી. સ્થાનિક લોકોએ તાત્કાલિક દોડી આવી મહિલાને બહાર કાઢી હતી. આ ઘટનામાં મહિલાને ઈજાઓ પહોંચી છે અને તેની લારી તેમજ સામાનને પણ ભારે નુકસાન થયું છે.
આ પણ વાંચો: ગુજરાત ATSનો મુંબઈમાં સપાટો! 22 કિલો એટોમિડેટ સાથે 2 આરોપી ઝડપાયા, ઈન્ટરનેશનલ ડ્રગ નેટવર્કનો ભંડાફોડ
તંત્ર અને કોન્ટ્રાક્ટરની ઘોર બેદરકારી
સ્થાનિકોમાં આ ઘટનાને લઈને ભારે રોષ જોવા મળી રહ્યો છે. આ દુર્ઘટના પાછળ મુખ્યત્વે નીચે મુજબની બેદરકારી સામે આવી છે. કામગીરીના સ્થળે સુરક્ષા માટેના કોઈ પણ સાઈન બોર્ડ કે બેરિકેટિંગ કરવામાં આવ્યું નહોતું. હાટકેશ્વર રોડ અત્યંત વ્યસ્ત હોવા છતાં, મ્યુનિસિપલ કોર્પોરેશનના બ્રિજ પ્રોજેક્ટ વિભાગે રોડ બંધ કર્યા વિના જ જોખમી કામગીરી ચાલુ રાખી હતી.
ઘટના બાદ મોટી સંખ્યામાં લોકો ઉમટી પડ્યા હતા અને કોન્ટ્રાક્ટરના માણસો સામે રોષ વ્યક્ત કર્યો હતો. સદનસીબે મોટી જાનહાનિ ટળી છે, પરંતુ આ ઘટનાએ કોર્પોરેશનની કામગીરી અને સુરક્ષા વ્યવસ્થા સામે મોટા પ્રશ્નાર્થો ઉભા કર્યા છે.
