માર્ચ-૨૦૨૬ની સરખામણીએ એપ્રિલમાં શિપની સંખ્યા બમણી
સંખ્યા ઘટવાના અંદાજથી વિપરિત શિપની સંખ્યા વધી ઃ વર્ષ-૨૦૨૬માં અત્યાર સુધીમાં અલંગમાં આવનાર શિપની સંખ્યા ૪૩ થઈ
ભાવનગર – મધ્ય પૂર્વના દેશોમાં તણાવની સ્થિતિની શિપ રિસાયક્લિંગ ઉદ્યોગ પર અસર પડે તેવા સંકેતો વર્તાઈ રહ્યા હતા અને તેના લીધે અલંગમાં આવનારા શિપની સંખ્યા ઘટશે તેવી શક્યતાઓ વચ્ચે એપ્રિલ-૨૦૨૫માં અલંગમાં આવનારા શિપની સંખ્યામાં નોંધપાત્ર વૃદ્ધિ જોવા મળી છે. એપ્રીલ-૨૦૨૬માં અલંગમાં કુલ ૧૪ શિપ આવ્યા છે. જે માર્ચ-૨૦૨૬ની સરખામણીએ બમણાં છે.
મધ્ય પુર્વના દેશોમાં સર્જાયેલી તણાવ પૂર્ણ સ્થિતિએ વૈશ્વિક વ્યાપાર પર અસર પાડી છે અને તેની અલંગના શિપ રિસાયક્લિંગ ઉદ્યોગ પર પણ અસર જોવા મળી હતી. ઈરાન, ઈઝરાયલ અને અમેરીકા વચ્ચે સર્જાયેલી સ્થિતિના લીધે અલંગમાં આવનારા શિપોની સંખ્યા ઘટે તેવી શક્યતાઓ શિપ રિસાક્લિંગ ઉદ્યોગ સાથે જોડાયેલા વેપારીઓ વ્યક્ત કરી રહ્યાં હતા. પરંતુ તેનાથી વિપરિત એપ્રિલ-૨૦૨૬માં અલંગમાં આવતા શિપની સંખ્યામાં નોંધપાત્ર વૃદ્ધિ જોવા મળી છે. એપ્રિલ મહિનામાં અલંગમાં કુલ ૧૪ શિપ આખરી સફરે આવ્યા છે. ચાલુ વર્ષે અત્યાર સુધીમાં અલંગમાં કુલ ૪૩ શિપ અલંગમાં બીચ થયાં છે. શિપની સંખ્યા ઉપરાંત ટનેજની બાબતમાં પણ એપ્રિલ મહિનો અલંગ માટે સારો રહ્યો છે. ૧૪ શિપોનું કુલ વજન ૧,૭૯,૧૮૪.૮૬ લાઈટ ડિલપ્લેસમેન્ટ ટનેજ (એમટી) થયું છે. જે છેલ્લા ૬ મહિનાનું સર્વાધિક છે. ઉપરાંત છેલ્લા ત્રણ નાણાંકીય વર્ષના એપ્રીલ મહિનામાં સિંગલ ડિજિટમાં રહેલી શિપની સંખ્યા નાણાંકીય વર્ષ ૨૦૨૬-૨૭ના એપ્રિલ મહિનામાં શિપની સંખ્યા ડબલ ડિઝિટમાં થઈ છે.
સ્પેશિયલ પર્પઝ/રિસર્ચ શિપ અલંગની આખરી સફરે
જળવાયુ પરિવર્તન, સમુદ્ર જીવ વિજ્ઞાાન, પૃથ્વી વિજ્ઞાાન જેવા વિષયો પર સંશોધન કરતા દક્ષિણ આફ્રિકાના એન્ટાર્કટિકા પ્રોગ્રામમાં એન્ટાર્કટિક રિસર્ચ સેન્ટર પર વૈજ્ઞાાનિકો અને પુરવઠો પહોંચાડવામાં મહત્વની કામગીરી કરનાર સ્પેશિયલ પર્પઝ/રિસર્ચ શિપ એમવી અગુલહાસ અલંગના પ્લોટ નં.૧માં ભંગાણાર્થે બીચ થયું છે. વર્ષ-૨૦૧૨માં નિવૃત્ત થયાં બાદ આ શિપનો ઉપયોગ તાલીમ માટે થયો હતો અને જાન્યુઆરી-૨૦૨૬માં તેની હરરાજી થઈ હતી.
