વડોદરા,તરસાલીમાં પાડોશી મહિલાએ આંખમાં મરચાનો પાવડર નાખી ડંડા વડે હુમલો કર્યો હતો. ઇજાગ્રસ્ત મહિલાએ આ અંગે મકરપુરા પોલીસ સ્ટેશનમાં ફરિયાદ નોંધાવી છે.
તરસાલી ઉમા વિદ્યાલય પાસે સિદ્ધેશ્વર હવનમાં રહેતા ગીતાબેન રાજેશભાઇ પાટણવાડિયાએ મકરપુરા પોલીસ સ્ટેશનમાં ફરિયાદ નોંધાવી જણાવ્યું છે કે,ગત ૨૯ મી તારીખે મારા પતિ કામ પર જતા હોઇ હું ઘરની બહાર આવી તેઓને લિફ્ટ સુધી મૂકવા ગઇ હતી. મારા પતિ લિફ્ટમાં ઉતરતા હતા. તે દરમિયાન અમારા પાડોશમાં રહેતા માહીબેન જાદવ તેમના ઘર પાસે ઊભા રહીને મને ગાળો બોલતા હતા. ઝઘડાનો અવાજ સાંભળીને મારા પતિ પરત આવ્યા હતા અને મને ઘરમાં લઇ જતા હતા. તે દરમિયાન માહીબેન તેમના ઘરમાંથી મરચાનો પાવડર અને ધોકો લઇને આવ્યા હતા. મારી આંખમાં મરચાનો પાવડર નાખી ડંડા વડે હુમલો કર્યો હતો. તેઓએ મને જાનથી મારી નાખવાની ધમકી આપી હતી.
