અમદાવાદ,મંગળવાર,17
માર્ચ,2026
અમદાવાદમાં ગરમીના આરંભે જ પાણીની માંગમાં ધરખમ વધારો થવા
પામ્યો છે.માથા દીઠ ૨૦૦ લીટરથી પણ વધુ પાણી વાપરનારા દરેક નાગરિકે પાણી સાચવીને
વાપરવુ પડશે.કેમકે આગળ આકરો ઉનાળો છે. ફેબુ્આરી મહિનામા શહેરના ૪૮ વોર્ડમાં
૧૭૫૨.૫૧ મિલીયન લીટર પાણી સપ્લાય આપવામા આવ્યો હતો.જેની તુલનામા માર્ચ મહિનાના મધ્યભાગ સુધીમાં ૧૭૯૬.૦૫ મિલીયન
લીટર પાણી રહેણાંક અને કોમર્શિયલ સહિતની તમામ મિલકતોને કોર્પોરેશન દ્વારા પુરુ
પડાયુ છે.અંદાજે ૪૪ એમ.એલ.ડી.પાણીનો વપરાશ વધે એ પણ ગરમીની શરુઆતમા એ વધુ હોવાનુ
આધારભૂતસૂત્રો તરફથી જાણવા મળ્યુ છે.
અમદાવાદને કોતરપુર વોટર ટ્રીટમેન્ટ પ્લાન્ટ ઉપરાંત જાસપુર
અને રાસ્કા વોટર ટ્રીટમેન્ટ પ્લાન્ટ મારફત ૨૩૫ વોટર ડિસ્ટ્રીબ્યુશન સ્ટેશન સુધી
દૈનિક ૧૭૯૬.૦૫ એમ.એલ.ડી.પાણી પુરુ પાડવામા આવી રહયુ છે.પાણી સપ્લાય માટે નિયત
કરેલી મર્યાદા મુજબ માથાદીઠ દૈનિક ૧૫૦ લીટર પાણી આપવાનુ હોય છે. આમ છતાં શહેરના
નદીપારના કેટલાક વિસ્તારોમાં તો માથાદીઠ ૨૦૦ લીટરથી પણ વધુ પાણી વાપરવામા આવે
છે.કોર્પોરેશન તરફથી રોજ જે પાણી સપ્લાય આપવામા આવે છે.તેમાં પાણીના કલોરીનેશન અને
પ્યુરીફિકેશન સહિતની પ્રક્રીયા કરી ૨૩૫
વોટર ડિસ્ટ્રીબ્યુશન સ્ટેશન સુધી પાણી પહોંચાડવાનો વાર્ષિક રુપિયા ૭૨૫
કરોડનો ખર્ચ છે.જેની સામે શહેરમાં ૧૯ લાખથી વધુ રહેણાંક મિલકત તથા ૬.૫૩ લાખ
કોમર્શિયલ મિલકતમાંથી વાર્ષિક રુપિયા ૨૬૪.૭૯ કરોડની વોટર ટેકસની આવક છે.કોર્પોરેશન
તરફથી રોજ આપવામા આવતા પાણી સપ્લાયની સામે થતા પાણીના વેડફાટને રોકવા પાંચ વર્ષમાં
ભાજપના ખાડિયાના એક માત્ર કોર્પોરેટર પંકજ બી ભટ્ટે પ્રયાસ કર્યા હતા. આ સિવાય
ભાજપના ૧૫૯, કોંગ્રેસના
૨૩ , એમ.આઈ.એમ.ના
૭ અને એક અપક્ષ કોર્પોરેટરે સતત પાંચ વર્ષ કયારેય પાણી બચાવવા પ્રયાસ કર્યા નથી.
મધ્યઝોન પાસે સ્ટોરેજની વ્યવસ્થાનો અભાવ
શહેરના સાત ઝોન પૈકી મધ્યઝોન એક એવો ઝોન છે કે જયાં મોટાભાગે પોળો અને ચાલી વિસ્તાર વધુ
પ્રમાણમા આવેલો છે. પાણીની કટોકટી સર્જાય એવા સંજોગોમા સૌથી વધુ પાણીની તકલીફ
મધ્યઝોનમા પડે કેમકે આ ઝોનમા પાણી સ્ટોરેજની કોઈ વ્યવસ્થા નથી. અન્ય ઝોનમાં કદાચ
પાણી ના આવે તો એક કે બે દિવસ ચાલે એટલા પાણીનો સંગ્રહ કરી શકાય એવી અંડરગ્રાઉન્ડ
કે ઓવરહેડ પાણીની ટાંકીની વ્યવસ્થા છે.
અમદાવાદમાં ઝોન દીઠ પાણી સપ્લાય કયાં-કેટલી માંગ વધી?
ઝોન ૧૨ ફેબુ્(એમએલડી) ૧૨ માર્ચ(એમએલડી)
દક્ષિણ ૨૮૯.૦૬ ૨૯૨.૭૬
ઉત્તર ૨૫૯.૮૦ ૨૭૦.૭૦
ઉ.પ. ૨૫૫.૧૨ ૨૫૭.૧૨
મધ્ય ૧૬૬.૩૨ ૧૭૨.૩૬
દ.પ. ૧૨૫.૭૭ ૧૨૯.૨૫
પશ્ચિમ ૩૩૯.૨૮ ૩૪૨.૧૨
પૂર્વ ૩૧૭.૧૬ ૩૩૧.૭૪
કુલ ૧૭૫૨.૫૧ ૧૭૯૬.૦૫
વોટર મીટર લગાવવાથી ૫૦ ટકા સુધી વપરાશ ઘટી શકે
અમદાવાદ મ્યુનિસિપલ કોર્પોરેશન દ્વારા ૧૪ વર્ષ પહેલા જોધપુર
અને સ્ટેડિયમ આ બે વોર્ડમાં પાણી સપ્લાય માટે વોટર મીટર લગાવવામા આવ્યા હતા.પરંતુ
જે તે સમયે વોટર મીટર ચોરાઈ જવાથી લઈ અન્ય કેટલાક વિવાદ થતા આખા શહેરમા પાણી માટે વોટર મીટર લગાવવાનુ આયોજન
પડતુ મુકવુ પડયુ હતુ. વોટર મીટર લગાવાથી ૫૦ ટકા સુધી પાણીનો વપરાશ ઘટી શકે અને
કોર્પોરેશનની નવી ટર્મમા પાણી બચાવવા માટે વોટર મીટર લગાવવાની દરખાસ્ત ફરીથી
લાવવામા આવે એવી પ્રબળ સંભાવના વ્યકત કરવામા આવી છે.
શહેરમાં ઝોન અને માથા દીઠ
દૈનિક પાણી વપરાશ કેટલો?
ઝોન વોટર સ્ટેશન વપરાશ(લીટરમાં)
મધ્ય ૧૯ ૨૨૦
પશ્ચિમ ૪૨ ૨૭૦
ઉત્તર ૩૨ ૨૧૩
દ.પ. ૨૫ ૨૧૭
ઉ.પ. ૩૨ ૩૦૯
દક્ષિણ ૪૫ ૨૩૩
પૂર્વ ૪૦ ૨૩૮
