રીબડા નજીક યુવાનની હત્યાનો ભેદ ઉકેલાયો : મૂળ બિહારના 6 આરોપીઓએ દારૂની મહેફિલમાં બોલાવી છરી-પથ્થરના ઘા ઝીંકી હત્યા કરી હતી
ગોંડલ, : કોટડાસાંગાણીના પડવલામાં આવેલા કારખાનામાં મજૂરી કરતાં મૂળ બિહારના ચંદન રાય (ઉ.વ. 26)ની હત્યા કરાયેલી લાશ ગત બુધવારે રાત્રે રીબડા નજીક અવાવરૂ જગ્યાએથી મળી આવી હતી. ગોંડલ તાલુકા પોલીસે ભેદ ઉકેલી મૂળ બિહારના જ છ આરોપીઓને ઝડપી લીધા છે. દારૂની મહેફિલમાં ચંદનની હત્યા કરાયાનું બહાર આવ્યું છે.
ગોંડલ તાલુકા પોલીસની તપાસમાં ખૂલ્યા પ્રમાણે આરોપી રાકેશના નાના ભાઇ નવીનની પત્ની સાથે લાલુ રાય (ઉ.વ. 22)ને એકાદ વર્ષ પહેલા આડા સંબંધ હતા. જેની જાણ આરોપી રાકેશ અને તેના નાના ભાઈ છોટેલાલને થઇ જતાં બંનેએ લાલુની હત્યા કરવાનું કાવતરૂ ઘડયું હતું. જેના ભાગરૂપે લાલુને જ્યા મર્ડર થયું ત્યાં દારૂની મહેફીલ માણવા બોલાવ્યો હતો.
લાલુ તેના કૌટુંબીક ભાણેજ ચંદન અને વિવેકને લઇને ઘટનાસ્થળે પહોંચ્યો હતો. જ્યાં દારૂની મહેફીલ બાદ આરોપીઓએ લાલુ ઉપર હુમલો કરતાં તે ત્યાંથી ભાગી ગયો હતો. જ્યારે તેની સાથે રહેલો કૌટુંબીક ભાણેજ ચંદન અને વિવેક વચ્ચે પડયા હતાં. જેમાથી ચંદને આરોપીઓને કહ્યું કે ક્યા કર લેગા તું. પરિણામે આરોપીઓએ ઉશ્કેરાઇ જઇ તેની ઉપર છરી વડે હુમલો કર્યો હતો. પથ્થરના ઘા પણ ઝીંકી દીધા હતા. જેમાં તેનું મોત નિપજ્યું હતું.
ગોંડલ તાલુકા પીઆઈ વી.એમ. ડોડીયા અને પીએસઆઈ આર.જે. જાડેજાએ એલસીબીની મદદ વગર ભેદ ઉકેલી આરોપી રાકેશ સુભાષ દરવે (રહે. ધરમનગર-4, કોઠારીયા મેઇન રોડ), તેના ભાઇ છોટેલાલ, નવીન સરગુન મંડલ, છોટુ નરેશ મંડલ, ગણેશ ઉર્ફે ડમરૂ શંભુ રાજપૂત અને નિરજ ઉર્ફે ભાલુ ભગતની ધરપકડ કરી હતી. બાકીના તમામ આરોપીઓ ભરૂડીમાં આવેલા કારખાનામાં મજૂરી કરી તેની જ ઓરડીમાં રહે છે. આ તમામ આરોપીઓ પણ બિહારના જ વતની છે.
