યુવાન ગામના ચોકમાં બેઠો હતો ત્યારે 5 શખ્સે આવીને ઝગડો કર્યો : હુમલાની મોડસ ઓપરેન્ડી પરથી યાગી ગેંગના શખ્સોની સંડોવણી હોવાની પોલીસને આશંકા : યુવાનની હત્યાથી પંથકમાં ચકચાર
ઉના, : ઉના તાલુકાના ચિખલીમાં રહેતો યુવાન ચોકમાં બેઠો હતો ત્યારે પાંચ શખ્સોએ આવી તેની સાથે ઝઘડો કર્યા બાદ તીક્ષ્ણ હથિયારના ઘા ઝીંકી દેતા યુવાનનું સારવાર પૂર્વે મોત થયું હતું અને બનાવ હત્યામાં પરિણમ્યો હતો. મોડસ ઓપરેન્ડી પરથી આ ઘટનામાં યાગી ગેંગના શખ્સોની સંડોવણી હોવાની આશંકા સાથે પોલીસે ફરિયાદ નોંધવા સહિતની તજવીજ હાથ ધરી છે.
ચિખલી ગામનો અક્ષય મોહનભાઈ મકવાણા હાલ માછીમારીની સિઝન પૂરી થઈ જવાથી ઘરે આવ્યો હતો. આ યુવાન આજે ગામના ચોકમાં પાનની દુકાન પાસે બેઠો હતો ત્યારે પાંચ શખ્સો બાઈક પર આવ્યા હતા અને અક્ષય સાથે ઝઘડો કર્યો હતો. ઝપાઝપી બાદ પાંચેય શખ્સોએ ઉશ્કેરાઈ જઈ તેને તીક્ષ્ણ હથિયાર ઝીંકી દેતા તેને છાતીના ભાગે ગંભીર ઈજા થતા તે ત્યાં ઢળી પડયો હતો અને હુમલાખોરો નાસી ગયા હતા. ઈજાગ્રસ્ત અક્ષયને લોહીલોહાણ હાલતમાં ઉના સરકારી હોસ્પિટલમાં ખસેડાયો હતો જ્યાં ફરજ પરના તબીબે તેને મૃત જાહેર કર્યો હતો. હત્યાની આ ઘટના અંગે જાણ થતા નવાબંદર પોલીસનો સ્ટાફ સ્થળ પર પહોંચ્યો હતો.
જે મુજબ હુમલો થયો છે તેના પરથી પોલીસને આ ઘટનામાં કોબની કુખ્યાત યાગી ગેંગના શખ્સોની સંડોવણી હોવાની આશંકા છે. હાલ પોલીસે ફરિયાદ દાખલ કરવા તજવીજ હાથ ધરી છે. વધુમાં જાણવા મળ્યા મુજબ, અક્ષય તેના માતા-પિતાનો એકનો એક પુત્ર હતો. તેની હત્યાથી ગામમાં ગમગીની સાથે ચકચાર વ્યાપી ગઈ હતી.
યાગી ગેંગના 7 શખ્સો સામે તાજેતરમાં જ ગુજસીટોકનો ગુનો દાખલ કરવામાં આવ્યો હતો. તેમાંથી બે શખ્સ હાલ જેલમાં છે, બે પકડાયા હતા જ્યારે ત્રણ શખ્સ ફરાર છે તેમાંથી કોઈ આ હુમલો કરવામાં સામેલ હોવાનું પોલીસનું અનુમાન છે. આ દિશામાં તપાસ શરૂ કરવામાં આવી છે.
