વડોદરા,એમ.એસ.યુનિવર્સિટીની ફાઇન આર્ટ્સ ફેકલ્ટીમાં અભ્યાસ કરતી વિદ્યાર્થિનીને ફેકલ્ટીમાં જ કરંટ લાગતા તેનું મોત થયું છે. બનાવ અંગે તેના પરિવારને જાણ કરતા તેઓ વલસાડથી વડોદરા આવવા નીકળી ગયા છે.
વલસાડ જિલ્લાના કોટેશ્વર નગર સેજલામુવાડામાં રહેતી ૨૨ વર્ષની કાજલ ચૌધરી વડોદરામાં ફતેગંજની શાંતિનિકેતન સોસાયટીમાં રહેતી હતી અને એમ.એસ.યુનિવર્સિટીની ફાઇન આર્ટ્સ ફેકલ્ટીમાં માસ્ટર્સમાં બીજા વર્ષમાં અભ્યાસ કરતી હતી.આજે બપોરે ફાઇન આર્ટ્સ પેઇન્ટિંગ ડિપાર્ટમેન્ટમાં બીજા માળે તે પેઇન્ટિંગનું કામ કરી રહી હતી. તેને ગરમ પાણીની જરૃર હોઇ એક ડોલમાં પાણી ભરી તેમાં ઇલેક્ટ્રિક રોડ મૂકી કામ કરતી હતી. તે દરમિયાન તેણે ડોલમાં હાથ નાંખતા જ ઇલેક્ટ્રિક રોડમાંથી લિકેજ થતા કરંટના કારણે તેને જોરદાર ઝટકો લાગ્યો હતો અને ત્યાં જ ઢળી પડી હતી. તેની બૂમો સાંભળી અન્ય વિદ્યાર્થીઓ દોડી આવ્યા હતા. તેઓ કાજલને સારવાર માટે ખાનગી હોસ્પિટલમાં લઇ ગયા હતા. પરંતુ, તેનો જીવ બચી શક્યો નહતો. બનાવ અંગે સયાજીગંજ પોલીસને જાણ કરતા પોલીસે સ્થળ પર જઇ મૃતદેહને પી.એમ. માટે સયાજી હોસ્પિટલમાં મોકલી આપી કાયદેસરની કાર્યવાહી હાથ ધરી છે.
ડિપાર્ટમેન્ટમાં કરંટ લાગ્યો ત્યારે વિદ્યાર્થિની એકલી જ હતી
વડોદરા,
પોલીસ સૂત્રોએ જણાવ્યું હતું કે,કાજલની સાથે એક અન્ય વિદ્યાર્થી પણ પેઇન્ટિંગ ડિપાર્ટમેન્ટમાં જ કામ કરતો હતો. પરંતુ, તે ૧૦ મિનિટ પહેલા જ કામ માટે ડિપાર્ટમેન્ટની બહાર નીકળ્યો હતો.વિદ્યાર્થિની ડિપાર્ટમેન્ટમાં એકલી જ હતી. તે દરમિયાન આ ઘટના બની હતી. ઉલ્લેખનીય છે કે, પેઇન્ટિંગ ડિપાર્ટમેન્ટના હેડ કે અન્ય સ્ટાફ દ્વારા આ રીતે જોખમી રીતે ડોલમાં પાણી ગરમ કરવા માટે ઇલેક્ટ્રિક રોડનો ઉપયોગ કેમ કરવા દેવામાં આવ્યો હતો ? તે અંગે પણ તપાસ હાથ ધરવામાં આવી છે.
