વડોદરા,કારેલીબાગ એલ એન્ડ ટી સર્કલ પાસે આજે સાંજે ટુ વ્હિલર પર જતા દંપતીને લક્ઝરી બસને ટક્કર મારતા પત્નીનું ઘટના સ્થળે જ કમકમાટીભર્યું મોત થયું હતું. અકસ્માતના પગલે છેક બંને બાજુ ટ્રાફિક જામ થઇ ગયો હતો. હરણી પોલીસે લક્ઝરી બસના ડ્રાઇવરની સામે ગુનો દાખલ કરી તેને ઝડપી પાડયો છે.
એરપોર્ટ સર્કલથી એલ એન્ડ ટી સર્કલ સુધીનો રોડ અકસ્માત ઝોન છે. આ રસ્તા પર અવારનવાર અકસ્માત થતા હોય છે. આજે સાંજે થયેલા અકસ્માતમાં એક વૃદ્ધાને જીવ ગુમાવવાનો વારો આવ્યો છે. કારેલીબાગ વી.આઇ.પી. રોડ બાલાજી દર્શનમાં રહેતા હીરાલાલ છાજેડ તથા તેમના પત્ની આજે સાંજે ઘરેથી ટુ વ્હિલર પર નીકળ્યા હતા. તેમના પત્ની શકુંતલાબેન(ઉ.વ .૬૬) ની આંખોનું આવતીકાલે ઓપરેશન હોઇ તેઓ હોસ્પિટલમાં ચેકઅપ માટે જતા હતા. એલ એન્ડ ટી સર્કલ પાસે ટ્રાફિક સિગ્નલ બંધ હોઇ તેઓ ઊભા રહ્યા હતા. તેમની પાછળ એક લકઝરી બસ ઊભી હતી. ટ્રાફિક સિગ્નલ ખૂલતા જ હીરાલાલે ટુ વ્હિલર ચલાવ્યું હતું. તે દરમિયાન લકઝરી બસના ચાલકે જવામાં ઉતાવળ કરતા ટુ વ્હિલરને ટક્કર વાગી હતી. હીરાલાલ અને તેમના પત્ની શકુંતલાબેન રોડ પર ફંગોળાઇને પડયા હતા.લક્ઝરી બસના આગળના પૈંડા શકુંતલાબેનના માથા પર ફરી વળતા તેઓનું ઘટના સ્થળે જ કરૃણ મોત થયું હતું. જ્યારે હીરાલાલને સામાન્ય ઇજા થઇ હતી. પોલીસે આ અંગે ગુનો દાખલ કરી લક્ઝરી બસના ડ્રાઇવરની ધરપકડ કરી કાયદેસરની કાર્યવાહી હાથ ધરી છે.
આઠ વર્ષ પહેલા બે વ્યક્તિના મોત થયા હતા
વડોદરા,
૩૧ ડિસેમ્બર ૨૦૧૭ ના રોજ એલ એન્ડ ટી સર્કલ નજીક બસ અને કારની ટક્કર વાગતા બાઇક સવાર બે વ્યક્તિના મોત થયા હતા.
૫ ઓગસ્ટ ૨૦૨૪ ના રોજ મોડીરાતે એક બસની બ્રેક ફેલ થતા ચાર વાહનો સાથે અથડાઇ હતી.
ઇ.એમ.ઇ.નો બ્રિજ બંધ હોઇ ટ્રાફિક જામ વધુ થયો
વડોદરા,
અકસ્માતના પગલે રોડ પર બંને તરફ એક કલાક સુધી ટ્રાફિક જામ થઇ ગયો હતો. એક તરફ ઇ.એમ.ઇ. નજીકનો બ્રિજ સમારકામના કારણે વાહન વ્યવહાર માટે બંધ હતો અને બીજી તરફ આ અકસ્માતના કારણે વધારે ટ્રાફિક જામની સમસ્યા સર્જાઇ હતી. પોલીસે ભારે જહેમત બાદ ટ્રાફિક પૂર્વવત્ કર્યો હતો.
ટુ વ્હિલર દેખાયું જ નહી હોવાની કેફિયત રજૂ કરતો ડ્રાઇવર
વડોદરા,
લક્ઝરી બસ વડુ ગામની એક કંપનીમાં ચાલે છે. આજે સાંજે એરપોર્ટ સર્કલથી નીકળી બસ ગેંડા સર્કલ જઇને ઊભી રહેવાની હતી. તે દરમિયાન એલ એન્ડ ટી સર્કલ નજીક અકસ્માત થયો હતો. પોલીસ ઘટના સ્થળે પહોંચી ત્યારે ડ્રાઇવર ઉસ્માન ઐયુબભાઇ મકરાણી (રહે. ઘોઘંબા, પંચમહાલ) ત્યાં જ ઊભો હોઇ પોલીસે તેને પકડી લીધો હતો. ડ્રાઇવરે પોલીસને જણાવ્યું હતું કે, મને ટુ વ્હિલર દેખાયું જ નહતું.
