પેરોલ ફર્લો સ્કવોડે મનપાની કચેરી સામે થી શખ્સને ઉઠાવ્યો
આઇડી પર સટ્ટો રમતા છ શખ્સના નામ ખુલ્યા
ભાવનગર, – આઇપીએલ ક્રિકેટ મેચ ઉપર હારજીતનો સટ્ટો રમતાં-રમાડતા એક ઇસમને પેરોલ ફર્લો સ્કવોડે ઝડપી લઇ કાયદેસરની કાર્યવાહી હાથ ધરી છે.
ભાવનગર પેરોલ ફર્લો સ્કવોડનો સ્ટાફ ભાવનગર શહેર વિસ્તારમાં પેટ્રોલીંગમાં હતાં. તે દરમ્યાન પોલીસ સ્ટાફને બાતમીરાહે હકિકત મળેલ કે, રાકેશ નરોતમભાઇ ઉંડવીયા (રહે.ત્રિવેણીપાર્ક, મુનીડેરી, ભાવનગર મૂળ રહે.ઉમરાળા ગામ ) વાળો ભાવનગર શહેર, મહાનગર પાલીકાની કચેરીની સામે પેટ્રોલપંપ પાસે જાહેર રોડ ઉપર ઉભો છે. અને મોબાઇલ ફોનમાંથી લાઇવ આઇપીએલની ક્રિકેટ મેચોમાં રન ફેરના સોદાઓ કરી રમતમાં રૃપિયાની હારજીતનો જુગાર રમી રમાડી રૃપિયાની હારજીત માટે અન્ય લોકોને જુગાર રમવાની આઇ-ડી ફોરવર્ડ કરી પૈસાની હાર-જીતનો જુગાર રમી,રમાડે છે.જે બાતમીના આધારે પેરોલ ફર્લો સ્કવોડના સ્ટાફ રેઇડ કરી રાકેશ નરોતમભાઈ ઉંડવીયાને મોબાઈલ ફોન રૃ.૩૦ હજાર સાથે ઝડપી લીધો હતો.પકડાયેલા શખ્સની પૂછપરછ દરમિયાન માસ્ટર આઇ.ડી.ની બેલેન્સમાંથી નવી પેટા આઇ.ડી. બનાવી વોટસએપ દ્વારા વિરલ વાલજીભાઇ વિરડીયા (રહે.વિજયરાજનગર, ભાવનગર હાલ-સુરત),દેવાંગ શરદભાઇ પટેલ (રહે.કણબીવાડ, ભાવનગર),કીરીટ ઉર્ફે કે.સી. છોટાલાલ શાહ (રહે.સુરત),રમેશ તુલશીભાઇ (રહે.સુરત),શુભમ નંદકિશોરભાઇ કંધેડીયા (રહે.રાજકોટ),રોહીત ગોબરભાઇ ગોહેલ (રહે.ચિત્રા, ભાવનગર) ને મોકલી સટ્ટો રમાડતો હતો.આ બનાવ સંદર્ભે પોલીસે સાત શખ્સ વિરૃધ્ધ નિલમબાગ પોલીસ મથકમાં ગુનો નોંધી વધુ તપાસ હાથ ધરી છે.
