મુંબઈ : મુંબઈ ઝવેરી બજારમાં આજે શનિવારના કારણે બુલિયન બજાર સત્તાવાર બંધ રહી હતી. જોકે બંધ બજારે સોના-ચાંદીના ભાવમાં વિશ્વ બજાર પાછળ ઘટાડો આગળ વધ્યો હતો. વિશ્વ બજારમાં ડોલર ઈન્ડેકસ ઉંચકાતાં વૈશ્વિક સોનામાં ફંડોનું સેલીંગ વધ્યાના સમાચાર મળ્યા હતા. વિશ્વ બજાર પાછળ ઘરઆંગણે ઈમ્પોર્ટ કોસ્ટ નીચી ઉતરતાં દેશના ઝવેરી બજારોમાં આજે ભાવમાં પીછેહટ ચાલુ રહી હતી. અમદાવાદ બજારમાં આજે સોનાના ભાવ ૧૦ ગ્રામના વધુ રૂ.૨૦૦૦ તૂટતાં બે દિવસમાં ભાવ રૂ.૪૦૦૦ તૂટી ગયા હોવાનું બજારના સૂત્રો જણાવી રહ્યા હતા.
દરમિયાન, વિશ્વ બજારમાં સોનાના ભાવ ઔંસના ૫૧૦૮થી ૫૧૦૯ વાળા ઘટી છેલ્લે સપ્તાહના અંતે ભાવ ૫૦૧૯થી ૫૦૨૦ ડોલર રહ્યા હતા. વિશ્વ બજારમાં ડોલર ઈન્ડેક્સ નીચામાં ૯૯.૫૯ થયા પછી ઉંચામાં ૧૦૦.૫૪ થઈ ૧૦૦.૫૦ રહ્યાના સમાચાર હતા. યુએસ બોન્ડ યીલ્ડ વધતાં તેની અસર પણ વૈશ્વિક સોનાના ભાવ પર નેગેટીવ દેખાઈ હતી.
દરમિયાન, ઘરઆંગણે અમદાવાદ બજારમાં સોનાના ભાવ ઘટી ૯૯૫ના રૂ.૧૬૧૭૦૦ તથા ૯૯૯ના રૂ.૧૬૨૦૦૦ રહ્યા હતા. અમદાવાદ ચાંદીના ભાવ કિલોના રૂ.૨૬૦૦૦૦ રહ્યા હતા. વિશ્વ બજારમાં સોના પાછળ ચાંદીના ભાવ ઔંસના ૮૪.૦૦થી ઘટી ૮૦.૫૯થી ૮૦.૬૦ ડોલર રહ્યા હતા.
દરમિયાન, મુંબઈ બુલિયન બજારમાં આજે સોનાના ભાવ ઘટી જીએસ ટી વગર ૯૯૫ના રૂ.૧૫૬૭૦૦ તથા ૯૯૯ના રૂ.૧૫૭૩૦૦ રહ્યા હતા જ્યારે મુંબઈ ચાંદીના ભાવ જીએસટી વગર રૂ.૩૫૦૦ જેટલા ઘટી રૂ.૨૫૬૮૦૦ આસપાસ બંધ બજારે બોલાઈ રહ્યા હતા.
દરમિયાન, મુંબઈ બુલિયન બજારમાં સોના-ચાંદીમાં જીએસટી સાથેના ભાવ આ ભાવથી ત્રણ ટકા ઉંચા રહ્યા હતા. વિશ્વ બજારમાં ક્રૂડતેલના ભાવ ફરી ઉછળ્યાના સમાચાર હતા. બ્રેન્ટ ક્રૂડના ભાવ બેરલના ૯૮.૭૪થી ઉછળી ઉંચામાં ભાવ ૧૦૩.૯૫ થઈ છેલ્લે ભાવ ૧૦૩.૧૪ ડોલર રહ્યા હતા. વોરમં તણાવ વધતાં તથા ક્રૂડમાં હેરફેરમાં અડચણના પગલે વિવિધ દેશોએ ઉત્પાદન ઘટાડયાના સમાચાર હતા. યુએસ ક્રૂડના ભાવ બેરલના ૯૩.૨૧થી વધી ૯૯.૩૨ થઈ ૯૮.૭૧ ડોલર રહ્યા હતા. ભારત માટે રશિયા તથા લાઈબેરીયાથી રવાના થયેલા ઓઈલ ટેન્કરો ભારત આવતા થયાના નિર્દેશો હતા.
દરમિયાન, ક્રૂડતેલના ભાવમાં ૧૫ દિવસમાં આશરે ૪૦ ટકાની તેજી આવી હોવાનું વૈશ્વિક સૂત્રોએ જણાવ્યું હતું. વિશ્વ બજારમાં ક્રૂડતેલ ફરી ઉછળતાં તથા વૈશ્વિક ડોલર ઈન્ડેક્સ પણ ઉંચકાતાં મુંબઈ કરન્સી બજારમાં આજે બંધ બજારે રૂપિયા સામે ડોલરના ભાવ રૂ.૯૨.૪૩ વાળા વધી રૂ.૯૨.૫૮થી ૯૨.૫૯ આસપાસ બોલાતા થતાં રૂપિયો નવા નીચા તળિયે ઉતરતો જોવા મળ્યો હતો.
દરમિયાન, વિશ્વ બજારમાં પ્લેટીનમના ભાવ ઔંસના ૨૦૯૦થી ૨૦૯૧ વાળા ઘટી ૨૦૨૮થી ૨૦૨૯ ડોલર રહ્યા હતા જ્યારે પેલેડીયમના ભાવ ૧૬૦૯થી ૧૬૧૦ વાળા ઘટી છેલ્લે ભાવ સપપ્તાહના અંતે ૧૫૫૩થી ૧૫૫૪ ડોલર રહ્યા હતા. વૈશ્વિક કોપરના ભાવ છેલ્લે ૧.૮૯ ટકા માઈનસમાં બોલાઈ રહ્યા હતા. અમેરિકામાં હવે નવા સપુતાહમાં ૧૭ તતા ૧૮ માર્ચે મળનારી ફેડરલ રિઝર્વની મિટિંગ પર બજારની નજર રહી હતી.
