– ગ્રામજનોએ જીપીસીબીને આવેદનપત્ર આપ્યું
– ગામની સીમમાં પ્લાન્ટ સ્થપાશે તો પર્યાવરણને જોખમ : પ્લાન્ટને મંજૂરી નહીં આપી પ્રતિબંધ મૂકવા માંગ
નડિયાદ : ખેડા તાલુકાના કનેરા ગામમાં પ્રસ્તાવિત કેમિકલ પ્લાન્ટ સ્થાપવાના આયોજન સામે ગ્રામજનોએ વિરોધ કર્યો છે. પ્લાન્ટને ગામમાં સ્થાપવાની મંજૂરી નહીં આપી તેના ઉપર સંપૂર્ણ પ્રતિબંધ મૂકવાની માંગણી સાથે જીપીસીબીને ગ્રામજનોએ રજૂઆત કરી છે.
કનેરાના ગ્રામજનોએ સંગઠિત થઈ જીપીસીબીને આવેદનપત્ર આપી જણાવ્યું છે કે, ખેડા તાલુકાના કનેરા ગામના સર્વે નં.- ૧૧૯/પી અને ૧૮૦ ખાતે મેસર્સ શિવ કેમ સ્પેશિયાલિટી કેમિકલ્સ પ્રા.લિ. કંપની દ્વારા પ્રસ્તાવિત સિન્થેટિક ઓર્ગેનિક કેમિકલ ટેક્સટાઈલ ઓક્સિલરી પ્લાન્ટ સ્થાપવાનું આયોજન કરાઈ રહ્યું છે. કંપનીના માલિક દ્વારા અગાઉ આ પ્લાન્ટ ડાલિયા એજ્યુકેશન ફાઉન્ડેશન કેમ્પમાં સ્થાપવા માટેનું આયોજન કરાયું હતું. જોકે, હવે આ પ્લાન્ટ કનેરા ગામની સીમમાં સ્થાપવાની આયોજન થયું છે. ત્યારે પર્યાવરણ અને સ્વાસ્થ્યના જોખમ અંગે કનેરાના ગ્રામજનોમાં ભય ફેલાયો છે. પ્લાન્ટના કારણે થનારા સંભવિત નુકસાન અંગે ગ્રામજનોએ ચિંતા વ્યક્ત કરી છે. પ્રદૂષણ ફેલાવનારો પ્લાન્ટ કોઈપણ ભોગે તેમના ગામમાં સ્થાપવામાં ના આવે અને પ્રદૂષણ નિયંત્રણ બોર્ડ આ મુદ્દે ગંભીરતાથી વિચારણા કરી પ્લાન્ટને મંજૂરી ના આપે તેવી તાકીદ કરી છે.
