– સાડા 11 વર્ષ પૂર્વે સ્વબચાવમાં પોલીસે ફાયરિંગ કરવું પડયું હતું
– સ્કોર્પિયોમાં દારૂનો મોટો જથ્થો લઈને બે શખ્સ નીકળ્યાં હતા, એક શખ્સનું ટ્રાયલ દરમિયાન મૃત્યુ
બોટાદ : ગઢડાના માંડવધાર રોડ પર દારૂ ભરેલી કારને પોલીસ ઉપર ચડાવી દઈ મારી નાંખવાના પ્રયાસના ચકચારી બનાવમાં કોર્ટે એક શખ્સને ત્રણ વર્ષ કેદની સજા ફટકારી હતી.
ગઢડાના માંડવધાર જવાના રસ્તા પરથી ગત તા.૧૫-૧-૨૦૧૪ના રોજ રાત્રિના સમયે બે શખ્સ સ્કોર્પિયો કારમાં વિલાયતી દારૂની મોટી ખેપ લઈને નીકળતા ગઢડા પીએસઆઈ ટી.એસ. રીઝવી અને સ્ટાફના માણસોએ કારને રોકવાનો પ્રયાસ કરતા ચાલકે પોલીસ સ્ટાફ ઉપર કાર ચડાવી દઈ તેમને મારી નાંખવાનો પ્રયાસ કરી ઈજાઓ પહોંચાડી હતી. જેથી પીએસઆઈએ સ્વબચાવમાં તેમની સર્વિસ રિવોલ્વરમાંથી નેપાલસિંહ પ્રતાપસિંહ ચૌહાણ નામના શખ્સ ઉપર એક રાઉન્ડ ફાયરિંગ કરતા અન્ય આરોપીએ પોલીસ ઉપર કાર ચડાવવા પ્રયાસ કરતા પીએસઆઈએ બીજી વખત ફાયરિંગ કર્યું હતું. બાદમાં દારૂ ભરેલી કાર સાથે નેપાલસિંહ અને હરિસિંહ નામના શખ્સોની ધરપકડ કરી પ્રોહિ. એક્ટની જુદી જુદી કલમો તેમજ હત્યાના પ્રયાસ અને ફરજમાં રૂકાવટ કરવા બદલ આઈપીસી ૩૦૭, ૩૩૨, ૧૧૪ વગેરે કલમો મુજબ ગુનો દાખલ કર્યો હતો.
આ અંગેનો કેસ બોટાદ ડિસ્ટ્રીક્ટ એન્ડ સેશન્સ કોર્ટમાં ચાલી જતાં ૧૮ સાક્ષીને તપાસવામાં આવેલ તેમજ જિલ્લા સરકારી વકીલ કે.એમ.મકવાણાની દલીલો, રજૂઆતો, રજૂ થયેલા ૫૬ દસ્તાવેજી પુરાવાને ગ્રાહ્ય રાખી ન્યાયમૂર્તિ એમ.જે.પરાસરે આરોપી નેપાલસિંહ ચૌહાણને આઈપીસી ૩૩૨ના ગુનામાં કસૂરવાર ઠેરવી ત્રણ વર્ષ કેદની સજા અને ૨૦ હજારનો દંડ ફટકાર્યો હતો. આ કેસની ટ્રાયલ દરમિયાન હરિસિંહ નામનો શખ્સ મૃત્યુ પામ્યો હતો.
