IPS Shamsher Singh: ગુજરાતના પોલીસ પ્રશાસનને લઈને એક મોટા સમાચાર સામે આવ્યા છે. કેન્દ્ર સરકારના ગૃહ મંત્રાલય દ્વારા 1991 બેચના સિનિયર IPS અધિકારી શમશેર સિંઘને તેમની પેરેન્ટ કેડર એટલે કે ગુજરાતમાં પરત મોકલવાનો મહત્વનો નિર્ણય લેવામાં આવ્યો છે. હાલમાં તેઓ સીમા સુરક્ષા દળ (BSF)માં એડિશનલ ડાયરેક્ટર જનરલ (ADG) તરીકે પ્રતિનિયુક્તિ પર સેવા આપી રહ્યા હતા.
‘પ્રિમેચ્યોર રિપેટ્રિએશન’ હેઠળ લેવાયો નિર્ણય
ગૃહ મંત્રાલય દ્વારા બહાર પાડવામાં આવેલા ઓફિસ મેમોરેન્ડમ અનુસાર, સક્ષમ સત્તાધિકારીએ શમશેર સિંઘના ‘પ્રિમેચ્યોર રિપેટ્રિએશન’ (સમય મર્યાદા પૂર્ણ થાય તે પહેલાં વતન કેડરમાં પરત મોકલવા)ની વિનંતીને મંજૂરી આપી દીધી છે. આ આદેશનો અમલ તાત્કાલિક અસરથી કરવામાં આવશે. આ અંગેની સત્તાવાર જાણ ગુજરાતના મુખ્ય સચિવ અને ડાયરેક્ટર જનરલ ઓફ પોલીસ (DGP)ને પણ કરી દેવામાં આવી છે.
ઇન્ચાર્જ DGP કરતા એક વર્ષ સિનિયર
શમશેર સિંઘની ગુજરાતમાં વાપસી બાદ રાજ્યના પોલીસ બેડામાં સમીકરણો બદલાઈ શકે તેમ છે.
– શમશેર સિંઘ 1991 બેચના IPS અધિકારી છે.
– તેઓ હાલમાં ગુજરાતના ઇન્ચાર્જ DGP ડો. કે.એલ.એન. રાવ કરતા એક વર્ષ સિનિયર છે.
– તેઓ માર્ચ 2026 માં નિવૃત્ત થવાના છે.
તેમની સિનિયોરિટીને જોતા એવી ચર્ચાઓએ જોર પકડ્યું છે કે આગામી સમયમાં તેમને રાજ્ય પોલીસ દળમાં કોઈ મહત્વની અને મોટી જવાબદારી સોંપવામાં આવી શકે છે.
ગુજરાતમાં બહોળો અનુભવ
કેન્દ્રીય ડેપ્યુટેશન પર ગયા પહેલા શમશેર સિંઘ ગુજરાતમાં વડોદરા પોલીસ કમિશનર સહિત અનેક મહત્વના હોદ્દાઓ પર સફળતાપૂર્વક ફરજ બજાવી ચૂક્યા છે. શિસ્તબદ્ધ અધિકારી તરીકેની છાપ ધરાવતા શમશેર સિંઘ હવે ટૂંક સમયમાં જ ગુજરાત પોલીસમાં વિધિવત રીતે કાર્યભાર સંભાળશે.
