જૂનાગઢ વોર્ડ નં. 3ના સભ્ય સામે કમિશનરની કાર્યવાહી : મનપાની 3 સામાન્ય સભામાં ગેરહાજર રહેતા સભ્યપદ રદ કરવું પડયું : હવે આગામી દિવસોમાં ખાલી બેઠકની પેટાચૂંટણી યોજાશે
જૂનાગઢ, : જૂનાગઢ મહાનગરપાલિકાના રાજકારણમાં મોટા સમાચાર સામે આવ્યા છે. વોર્ડ નંબર-3ના ભારતીય જનતા પાર્ટીના નગરસેવક અબ્બાસ ઈબ્રાહિમ કુરેશીને કમિશનર દ્વારા નગરસેવક પદેથી સસ્પેન્ડ કરવાનો મહત્વનો આદેશ કરવામાં આવ્યો છે. ગુજસીટોક જેવા ગંભીર ગુનામાં જેલવાસ ભોગવી રહેલા અબ્બાસ કુરેશી મનપાની સામાન્ય સભાઓમાં સતત ગેરહાજર રહેતા આ કાર્યવાહી કરવામાં આવી છે.
ભાજપના વોર્ડ નંબર-3ના નગરસેવક અને ગેમ્બલર ગેંગના મુખ્ય સૂત્રધાર અબ્બાસ કુરેશી સામે થોડા સમય પૂર્વે પોલીસ દ્વારા ગુજસીટોક હેઠળ ગુનો દાખલ કરવામાં આવ્યો હતો. આ ગંભીર ગુનામાં ધરપકડ થયા બાદ તેઓ હાલ જેલમાં છે. જેલવાસને કારણે તેઓ મહાનગરપાલિકાની સતત ત્રણ સામાન્ય સભામાં હાજર રહી શક્યા ન હતા. ગુજરાત પ્રોવિન્શિયલ મ્યુનિસિપલ કોર્પોરેશન એક્ટની જોગવાઈ મુજબ જો કોઈ સભ્ય પૂર્વ મંજૂરી વગર સતત ત્રણ સામાન્ય સભામાં ગેરહાજર રહે તો તેઓ સભ્યપદે ચાલુ રહેવા માટે લાયક રહેતા નથી. આ અંગેનો અહેવાલ કમિશનર સમક્ષ રજૂ કરવામાં આવ્યો હતો. મનપા કમિશનરે તમામ પાસાઓની ચકાસણી કર્યા બાદ અબ્બાસ કુરેશીને નગરસેવક પદેથી ગેરલાયક ઠેરવતો હુકમ કર્યો છે.
આ નિર્ણય બાદ જૂનાગઢ મહાનગરપાલિકા દ્વારા જિલ્લા કલેક્ટરને સત્તાવાર રિપોર્ટ સોંપવામાં આવ્યો છે કે વોર્ડ નંબર-3ની એક બેઠક ખાલી પડી છે. નિયમ મુજબ બેઠક ખાલી પડયાના નિર્ધારિત સમયમાં ત્યાં પેટાચૂંટણી યોજવી અનિવાર્ય છે. જેના પગલે આગામી સમયમાં વોર્ડ નંબર-3ની આ બેઠક માટે પેટાચૂંટણી યોજાય તેવી પૂરેપૂરી શક્યતા છે. સત્તાધારી પક્ષ ભાજપના જ નગરસેવક સામે આ પ્રકારની કડક કાર્યવાહી થતા સ્થાનિક રાજકારણમાં ગરમાવો આવી ગયો છે. ગુનાહિત પ્રવૃત્તિઓ અને વહીવટી શિસ્ત બાબતે તંત્ર દ્વારા લેવાયેલું આ પગલું અન્ય સભ્યો માટે પણ લાલબત્તી સમાન માનવામાં આવી રહ્યું છે.
ભાજપ ચૂંટણી જીતવા આવા તત્વોને ટિકિટ આપે છે
ગુનાહિત ઇતિહાસ ધરાવતો અબ્બાસ કુરેશી અનેક ગુનામાં સંડોવાયેલો છે. અબ્બાસ સામે હત્યાનો પ્રયાસ, લૂંટ, પોલીસ પર હુમલો, રાયોટીગ સહિતના અનેક ગંભીર ગુનાઓ નોંધાયેલા છે. આમ છતાં ભાજપ દ્વારા તેમને અને તેમના પરિવારના સભ્યોને ટિકિટ આપવામાં આવી હતી. અબ્બાસ કુરેશી દાદાગીરી કરતો હોવાના લીધે તેમની સામે કોઈ ચૂંટણી પણ લડતા નથી અને ફોર્મ ભરે તો પરત ખેંચી લે છે, અબ્બાસની દાદાગીરીના કારણે તે અને તેમનો પરિવાર તથા તેની વોર્ડના તમામ સભ્યો બિનહરીફ ચૂંટાઈ જાય છે. પોલીસે આ વખતે કાયદાનો સંકજો કસતા સભ્યપદ ગુમાવવાનો વારો આવ્યો છે.
