બાઈક પર આવેલા બે બુકાનીધારી શખ્સોનું કારસ્તાન : ઓફિસમાં કાચ ફોડીને ગોળી મંદિરમાં લાગી, આરામ કરતા મેનેજર અને ફિલરમેનનો બચાવ, 2 શખ્સો CCTVમાં કેદ
ગોંડલ,: ગોંડલ પંથકમાં હમેંશા ચર્ચામાં રહેતા રીબડા ગામે ક્ષત્રિય આગેવાન અનિરૂદ્ધસિંહ જાડેજાના ભત્રીજાના પેટ્રોલ પમ્પ પર ગત મોડી રાત્રે બે બુકાનીધારી શખ્સોએ બાઇક પર આવીને ફાયરિંગ કર્યાનો બનાવ સામે આવતા ખળભળાટ મચી જવા પામ્યો છે. એક રાઉન્ડ ફાયરિંગ કરી નાસી જનાર બન્ને શખ્સો વિરૂદ્ધ ગોંડલ પોલીસે ગુનો નોંધી સીસીટીવીના આધારે શોધખોળ હાથ ધરી છે.
રાજકોટના કોઠારીયા સોલવન્ટ વિસ્તારમાં રહેતા અને રીબડા ગામે પેટ્રોલ પમ્પ ધરાવતા જયદીપસિંહ ભાગીરથસિંહ જાડેજાની માલિકીના રીબડા પેટ્રોલિયમમાં ફિલરમેન તરીકે નોકરી કરતા જાવેદ રહીમભાઈ ખોખર નામના 38 વર્ષીય યુવાને ગોંડલ તાલુકા પોલીસ મથકમાં નોંધાવેલી ફરિયાદમાં જણાવ્યું હતું કે, ગઇકાલે રાત્રીના આઠ વાગ્યે નોકરી પર આવ્યો હતો અને મેનેજર જગદીશસિંહ ચંદુભા ગોહિલ (રહે.મવડી ચોકડી, રાજકોટ) પણ હાજર હતા. મોડી રાત્રીના વાહનો ઓછા આવતા હોવાથી પેટ્રોલ પંપની ઓફીસમાં આવી ગયા હતા. જ્યાં બન્ને આરામ કરતા હતા, ત્યાં રાત્રીના એકાદ વાગ્યાની આસપાસ અચાનક ઓફીસના કાચ ઉપર ફાયરીંગ થયું હતું. જેથી કાચ ફોડીને ગોળી અંદર ઓફીસમાં રહેલા મંદિરના ખુણા ઉપર લાગી હતી. જેથી તરત જ ઉભા થઈને ઓફીસના દરવાજે આવી જોતા બાઇક પર મોઢે રૂમાલ બાંધેલા બે અજાણ્યા શખ્સો હતા. જેઓએ ફિલરમેન સામે બંદુક તાકી એટલે એ ગભરાઈને ઓફીસની અંદર આવી જતાં ફાયરિંગ કરનાર બંને શખ્સો પોતાનું બાઇક લઈને નાસી ગયા હતા. બાદમાં મેનેજર જગદીશસિંહે પેટ્રોલપંપના માલિક જયદીપસિંહ જાડેજા તથા રીબડા ગામના સત્યજીતસિંહ જાડેજાને ફોન કરીને બનાવની જાણ કરતા બન્ને પેટ્રોલ પમ્પ ખાતે દોડી આવ્યા હતા. જેમણે ઓફિસ ખાતે જોતા દરવાજા પાસે ગોળી પડી હતી અને બહારના ભાગે કારતુસનું એક ખાલી ખોખુ જોવા મળ્યું હતું. સદનશીબે ફાયરિંગની ઘટનામાં કોઈને ઇજા પહોંચી ન હતી. બનાવને પગલે ગોંડલ તાલુકા પોલીસે બીએનએસની કલમ 109, 54 તેમજ આર્મ્સ એક્ટ હેઠળ ગુનો નોંધ્યો હતો. જયારે એલસીબી, એસઓજી સહીતની ટીમે અલગ આલગ દિશામાં સીસીટીવી ફૂટેજના આધારે તપાસનો ધમધમાટ શરૂ કર્યો હતો.
