વડોદરાઃ શહેરના ભૂતડીઝાંપા વિસ્તારની વૃધ્ધ મહિલાને આતંકવાદી અને મની લોન્ડરિંગ કનેક્શનના નામે ધમકાવી ૧.૮૨ કરોડ પડાવી લેવાના બનાવ બાદ હવે ગોત્રી વિસ્તારના ૮૨ વર્ષના વૃધ્ધને ઇન્વેસ્ટમેન્ટના નામે ફસાવી ઠગોએ ૧.૧૧ કરોડ પડાવી લીધા હોવાનો બનાવ બનતાં સાયબર સેલે ગુનો નોંધ્યો છે.
સોશ્યલ મીડિયા પર લોભામણી જાહેરાતો મૂકી ઇન્વેસ્ટમેન્ટના નામે લાખો રૃપિયા ટ્રાન્સફર કરાવી લેવામાં આવતા હોવાના કિસ્સાઓ વારંવાર બની રહ્યા છે.ગોત્રી વિસ્તારના એક વૃધ્ધને આવી જ રીતે ઇન્વેસ્ટમેન્ટમાં ૮૫૦ ટકાના પ્રોફિટના નામે ફસાવવામાં આવ્યા હતા.
ઠગોએ તેમની પાસે એપ ડાઉનલોડ કરાવી હતી.ત્યારબાદ રજિસ્ટ્રેશન કરાવવાના નામે બેન્ક એકાઉન્ટની ડીટેલ મેળવી હતી.તેમને જુદાજુદા વોટ્સએપ ગુ્રપમાં જોઇન કરવામાં આવ્યા હતા.જેમાં ઠગો દ્વારા પ્રોફિટના સ્ક્રીનશોર્ટ મૂકવામાં આવતા હતા.
ગોત્રીના વૃધ્ધના નામનું એક ફેક પણ એકાઉન્ટ બનાવવામાં આવ્યું હતું અને દોઢ મહિનાના ગાળામાં તેમની પાસે રૃ.૧.૨૦ કરોડ ટ્રાન્સફર કરાવી લેવામાં આવ્યા હતા. ઠગોએ તેમને વિશ્વાસમાં લેવા માટે રૃ.૯ લાખ પરત પણ કર્યા હતા.
ઇન્વેસ્ટરને તેમના ડિજિટલ એકાઉન્ટમાં ૯૦ કરોડ જેટલો પ્રોફિટ પણ બતાવવામાં આવતો હતો.પરંતુ આ રકમ ઉપાડવા માટે તેઓ પ્રયાસ કરે ત્યારં કોઇને કોઇ બહાનું બતાવી તેમની પાસે રકમ માંગવામાં આવતી હતી.જેથી તેમને ઓનલાઇન ઠગાઇનો ભોગ બન્યા હોવાનું જણાતાં સાયબર સેલને જાણ કરી હતી.
સિનિયર સિટિઝનોને ફસાવવા માટે ઠગો દ્વારા અજમાવાતી તરકીબો
સિનિયર સિટિઝનોને ફસાવવા માટે ઠગો દ્વારા ઉપયોગમાં લેવાતી મુખ્ય તરકીબો આ મુજબ છે.
– ઇન્વેસ્ટમેન્ટના નામે જંગી ફાયદો કરી આપવાની સ્કીમ અને તેના સ્ક્રીનશોર્ટ
– મની લોન્ડરિંગમાં તમારાનામના સિમકાર્ડ અને બેન્ક એકાઉન્ટનો ઉપયોગ
– તમે પોર્નોગ્રાફી રીલ જોઇ રહ્યા છો
-ફેસબુક પર ફ્રેન્ડરિક્વેસ્ટ મોકલી વીડિયો કોલ કરીને
– ક્રેડિટ કાર્ડ કે એટીએમ કાર્ડ સસ્પેન્ડ થઇ જશે
– તમારા નામના પાર્સલમાંથી ડ્રગ્સ મળ્યું છે.
સેબીની મંજૂરી અને કંપનીના ફેક દસ્તાવેજો મોકલ્યા
ગોત્રી વિસ્તારના ૮૨ વર્ષીય ઇન્વેસ્ટર આસાનીથી ફસાય તેમ નહિ લાગતાં ઠગોએ તેમને વિશ્વાસમાં લેવા માટે કંપનીને સેબીએ મંજૂરી આપી હોવાનો તેમજ ઇન્વેસ્ટમેન્ટના સર્ટિફિકેટ અને બોગસ દસ્તાવેજો તૈયાર કરી વોટ્સએપ પર મોકલ્યા હતા.
સિનિયર સિટિઝનો સાથે ફ્રોડના બહુચર્ચિત કિસ્સાઃઆપઘાતનો પહેલો બનાવ
(૧) નવેમ્બર-૨૦૨૫ઃ વડોદરા પાસેના કાયાવરોહણ ગામના ખેડૂત અતુલભાઇ પટેલને એટીએસના નામે ૪૦ કરોડના ફ્રોડ કેસની ધમકી મળતાં દવા પી આપઘાત કર્યો હતો.ડિજિટલ એરેસ્ટના કેસમાં આપઘાતનો આ પહેલો બનાવ હતો.
(૨) ૪-૧૨-૨૦૨૫ઃ ભૂતડીઝાંપાની વૃધ્ધ મહિલાને આતંકવાદી કનેક્શનના નામે ધમકાવી ૧.૮૨ કરોડ પડાવ્યાની ફરિયાદ.
(૩)ઓક્ટોબર-૨૦૨૫ઃ મકરપુરાના નિવૃત્ત બેન્ક ઓફિસરને મની લોન્ડરિંગમાં સિમકાર્ડનો ઉપયોગ થયો હોવાનું કહી ડિજિટલ એરેસ્ટના નામે ૬૪.૪૦ લાખ પડાવ્યા.
(૪) એપ્રિલ-૨૦૨૫ઃ ગોત્રીની મહિલાને મની લોન્ડરિંગના નામે ૭ મહિના ડિજિટલ એરેસ્ટ કરી ૧.૮૯ કરોડ ટ્રાન્સફર કરાવી લીધા.
(૫) ફેબુ્રઆરી-૨૦૨૫ઃ ગોત્રીની મહિલાને મની લોન્ડરિંગના કેસમાં ડિજિટલ એરેસ્ટ કરી ૬૧લાખ પડાવ્યા.
