Godhra News: પંચમહાલ જિલ્લાના ગોધરા શહેરમાં આગામી પવિત્ર રમઝાન માસને ધ્યાનમાં રાખીને માર્ગો પર ટ્રાફિક સમસ્યા ન સર્જાય તે હેતુથી બી ડિવિઝન પોલીસ, સિટી ટ્રાફિક અને નગરપાલિકાની ટીમ દ્વારા સંયુક્ત રીતે મેગા દબાણ હટાવો ઝુંબેશ હાથ ધરવામાં આવી હતી.
ગોધરામાં રમઝાન માસ પૂર્વે ટ્રાફિકને નડતરરૂપ દબાણો દૂર કરાયા
આ ઓપરેશન દરમિયાન શહેરના મુખ્ય બજાર વિસ્તારોમાં જાહેર માર્ગો પર પથરાયેલા દબાણો દૂર કરી રસ્તાઓ ખુલ્લા કરવામાં આવ્યા હતા. સાથે જ ટ્રાફિકને અડચણરૂપ વાહનચાલકો સામે દંડાત્મક કાર્યવાહી કરી ત્રણ વાહનો ડિટેન કરવામાં આવ્યા હતા અને ₹15 હજારથી વધુ દંડ વસૂલ કરવામાં આવ્યો હતો.
આ પણ વાંચો: પંચમહાલ: સ્માર્ટ મીટર લગાવવાના વિરોધમાં શિવરાજપુર ગામ બંધનું એલાન, MGVCLની ટીમને લોકોએ અટકાવી
કયા વિસ્તારોમાં દબાણ હટાવાયું
બી ડિવિઝન વિસ્તારમાં આવેલા જહુરપુરા માર્કેટ, ચોકી નંબર-2, સાત નંબર વિસ્તાર, રાણી મસ્જિદ, મેડ સર્કલ, કાલાભાઈ પેટ્રોલ પંપ, પોલાન બજાર અને રેલવે સ્ટેશન જેવા સતત ધમધમતા વિસ્તારોમાં તંત્ર દ્વારા કડક કામગીરી હાથ ધરવામાં આવી હતી. રમઝાન માસ દરમિયાન બજારોમાં ખરીદી માટે મોટી સંખ્યામાં લોકો ઉમટતા હોવાને કારણે ટ્રાફિક જામ ન સર્જાય તે માટે પાલિકાની ટીમે રસ્તા પરના દબાણો દૂર કર્યા હતા.
ઉપરાંત જાહેર માર્ગો પર આડેધડ પાર્કિંગ કરનારા વાહનચાલકોને સ્થળ પર જ દંડ ફટકારી કાયદેસરની કાર્યવાહી કરવામાં આવતા દબાણકર્તાઓમાં ફફડાટ વ્યાપી ગયો હતો.
