અમદાવાદ : સોના અને ચાંદીના એક્સચેન્જ-ટ્રેડેડ ફંડ્સ (ઈટીએફ)ની સંયુક્ત એસેટ અન્ડર મેનેજમેન્ટ (એયુએમ) ડિસેમ્બર ૨૦૨૫માં રૂ. ૨ લાખ કરોડને પાર થઈ ગઈ છે. રેકોર્ડ રોકાણો અને કિંમતી ધાતુના ભાવમાં સતત તેજીને કારણે માત્ર ચાર મહિનામાં જ એસેટ અન્ડર મેનેજમેન્ટ બમણી થઈ ગઈ છે.
એસોસિએશન ઓફ મ્યુચ્યુઅલ ફંડ્સ ઇન ઇન્ડિયા (એમ્ફી)ના ડેટા અનુસાર કેલેન્ડર વર્ષ ૨૦૨૫ની શરૂઆતમાં કુલ એયુએમ રૂ. ૫૭,૦૦૦ કરોડ હતી, જે સપ્ટેમ્બર સુધીમાં લગભગ બમણી થઈને રૂ. ૧ લાખ કરોડ થઈ અને હવે તો રૂ. ૨ લાખ કરોડના નવા શિખરને આંબી ગઈ છે.
બંને ઈટીએફમાં રેકોર્ડ રોકાણોને કારણે તેમના એયુએમમાં તીવ્ર વધારો થયો છે. અંદાજ મુજબ, ડિસેમ્બર ૨૦૨૫માં ગોલ્ડ ઈટીએફમાં આશરે રૂ. ૧૧,૭૦૦ કરોડનું ઈન્વેસ્ટમેન્ટ આવ્યું હતુ, જે કેલેન્ડર મહિનામાં અત્યાર સુધીનો સૌથી વધુ છે. ચાંદીના ઈટીએફમાં રોકાણ પણ ગત મહિને બમણાથી વધુ વધીને રૂ. ૨૧૫૪ કરોડથી રૂ. ૪,૭૦૦ કરોડ થયું છે. ડિસેમ્બરના રોકાણ સાથે ૨૦૨૫ માટે ગોલ્ડ ઈટીએફમાં કુલ નેટ રોકાણ રૂ. ૪૩,૦૦૦ કરોડ સુધી પહોંચી ગયું. ચાંદીના ઈટીએફમાં વાર્ષિક રોકાણ રૂ. ૨૪,૨૦૦ કરોડ રહ્યું છે.
૨૦૨૫ના બીજા અર્ધવાર્ષિકમાં ગોલ્ડ ઈટીએફમાં નેટ ઈન્વેસ્ટમેન્ટ તમામ મ્યુચ્યુઅલ ફંડ કેટેગરીઓમાં બીજા ક્રમે રહેવાની ધારણા છે, જે ફ્લેક્સી-કેપ ફંડ પછી બીજા ક્રમે છે. ૨૦૨૫માં સ્થાનિક બજારમાં સોનાના ભાવમાં ૭૫ ટકાનો વધારો થયો હતો, જ્યારે ચાંદીના ભાવમાં ૧૬૮ ટકાનો જંગી ઉછાળો આવ્યો હતો.
સતત ભૂરાજકીય તણાવ, મુખ્ય કેન્દ્રીય બેંકો દ્વારા વ્યાજદરમાં ઘટાડાની અપેક્ષાઓ અને નબળા પડતા યુએસ ડોલરને કારણે સલામત રોકાણ તરીકે સોના-ચાંદીની આકર્ષણમાં વધારો થયો હતો. મજબૂત ઔદ્યોગિક માંગ, ખાસ કરીને સોલર અને ઇલેક્ટ્રિક વાહન ઉદ્યોગો અને સપ્લાય ઘટની મર્યાદાઓને કારણે ચાંદીના ભાવને પણ ટેકો મળ્યો હતો.
સોના અને ચાંદીના ઈટીએફમાં રોકાણકારોનો વધતો રસ નવા એકાઉન્ટ ઓપનિંગાના આંકડાઓ પરથી પણ પ્રતિબિંબિત થાય છે. ચાલુ વર્ષ ૨૦૨૫ના પ્રથમ ૧૧ મહિનામાં ગોલ્ડ ઈટીએફ એકાઉન્ટ્સ અથવા ફોલિયોમાં ૫૩ ટકાનો વધારો થયો છે, જ્યારે ચાંદીના ઈટીએફ એકાઉન્ટ્સ ચાર ગણા વધી ગયા છે.
